कोलकाता, 14 मई (हि.स.)। पश्चिम बंगालको आसनसोलमा पूर्वी कोलफील्ड लिमिटेड (ईसीएल) को कुनुस्तोरिया क्षेत्रको पड़ाशिया (परशिया) कोलियरीको भूमिगत खानीमा विनाशकारी एयर ब्लास्ट भएको छ। दुर्घटनामा 40 भन्दा बढ़ी श्रमिक गम्भीर घाइते भएका छन् भने एक श्रमिकको मृत्यु भएको छ। यद्यपि, समाचार लेखिञ्जेलसम्म खानी व्यवस्थापनले आधिकारिक रूपमा यसको पुष्टि गरेको थिएन।

प्राप्त जानकारी अनुसार, बुधवार बिहान पहिलो सिफ्टको क्रममा बिहान 10.30 बजीतिर श्रमिकहरू खानीको 27 नम्बर विभागमा कोइला काटिरहेका थिए। अचानक खानीको तहबाट शक्तिशाली एयर ब्लास्ट भयो, जसले भित्र अत्यधिक हावाको चाप सिर्जना गर्यो । विस्फोटले श्रमिकहरूहरूलाई टाढ़ा फ्याँक्यो र धेरैलाई गम्भीर घाइते बनायो। दुई अधिकारीहरू सहित लगभग 20-25 श्रमिकहरू त्यतिबेला खानीमा उपस्थित थिए।

ज्ञात होस्, एयर ब्लास्ट एक अत्यन्त खतरनाक घटना हो, जुन मुख्यतया भूमिगत कोइला खानीहरूमा छत भत्किएको कारण हुन्छ। यस घटनामा खानी भित्रको खाली ठाउँमा फसेको हावा अचानक तीव्र दबाबमा बाहिर निस्कन्छ, जसले खानी कामदारहरूलाई घाइते बनाउन वा मार्नसक्छ र मेसिनरीहरू नष्ट गर्नसक्छ।

प्रत्यक्षदर्शी श्रमिक राकेश कुर्मीले बिहान 10.30 बजीतिर अचानक शक्तिशाली विस्फोट महसुस भएको बताए। हावाको चाप तुरुन्तै बढ्यो र त्यहाँ उपस्थित सबै ढले। कसैले बुझ्नु अघि नै सम्पूर्ण क्षेत्र धुलो र धुवाँले भरियो। त्यस समय त्यहाँ दुई अधिकारीहरू सहित लगभग 20-25 जना काम गरिरहेका थिए। दुर्घटनाले खानी भित्र आतंक मच्चायो। जानकारी पाएपछि अधिकारीहरू र उद्धार टोलीले तुरुन्तै राहत र उद्धार कार्य शुरू गऱ्यो। घाइतेहरूलाई बाहिर निकालेर रानीगञ्जको बांसड़ा क्षेत्र अस्पताल, अन्य ईसीएल अस्पतालहरू र दुर्गापुरको एक निजी अस्पतालमा भर्ती गरिएको छ।

अस्पताल सूत्रहरू अनुसार, धेरै घाइतेहरूको अवस्था गम्भीर छ। घाइतेहरूमा धेरै ठेका मजदुरहरूका साथै कोलियरीका अतिरिक्त प्रबन्धक दिलीप कुमार पनि छन्। यो घटनाले खानीको सुरक्षामाथि गम्भीर प्रश्न उठाएको छ।

यसैबीच श्रमिक संगठनहरूले दुर्घटनाको विरोधमा विरोध प्रदर्शन गरेका छन्। खानी व्यवस्थापनको लापरवाही र पर्याप्त सुरक्षा उपायहरूको अभावका कारण दुर्घटना भएको उनीहरूको आरोप छ। उनीहरूले घटनाको उच्चस्तरीय अनुसन्धान र दोषीहरू विरूद्ध कड़ा कारबाहीको माग गरेका छन्।

हाल प्रशासन र खानी व्यवस्थापनले यस विषयमा अनुसन्धान शुरु गरेको छ। यो घटनापछि श्रमिकहरूमा व्यापक आक्रोश र डर छ।

हिन्दुस्थान समाचार / भवानी थामी