नयाँ दिल्ली, 15 मई (हि.स.)। पश्चिम एशियामा जारी संकटका बीच सार्वजनिक क्षेत्रका तेल तथा ग्यास विपणन कम्पनीहरूले पेट्रोल र डिजलको मूल्यमा प्रतिलिटर ३-३ रुपियाँ वृद्धि गरेका छन्। सीएनजीको मूल्य पनि प्रतिकिलोग्राम २ रुपियाँले बढाइएको छ। नयाँ दर आजदेखि लागू भएको छ। करिब चार वर्षपछि पेट्रोल-डिजेलको मूल्य वृद्धि गरिएको हो।

दिल्लीमा अब पेट्रोलको मूल्य ९४.७७ रुपियाँबाट बढेर प्रतिलिटर ९७.७७ रुपियाँ पुगेको छ भने डिजलको मूल्य ८७.६७ रुपियाँबाट बढेर प्रतिलिटर ९०.६७ रुपियाँ पुगेको छ। कोलकाता, मुम्बई र चेन्नईजस्ता महानगरहरूमा पनि इन्धनको मूल्यमा वृद्धि भएको छ।

कोलकातामा पेट्रोल ३.२९ रुपियाँले बढेर अब प्रतिलिटर १०८.७४ रुपियाँ पुगेको छ। देशको आर्थिक राजधानी मुम्बईमा पेट्रोल ३.१४ रुपियाँले बढेर प्रतिलिटर १०६.६८ रुपियाँमा उपलब्ध भइरहेको छ। दक्षिण भारतको प्रमुख सहर चेन्नईमा पेट्रोलको मूल्य २.८३ रुपियाँले बढेर नयाँ मूल्य प्रतिलिटर १०३.६७ रुपियाँ पुगेको छ।

कोलकातामा डिजलको मूल्य ३.११ रुपियाँले बढेको छ। त्यहाँ एक लिटर डिजेल ९५.१३ रुपियाँमा पाइन्छ। मुम्बईमा पनि डिजेल ३.११ रुपियाँले महँगिएर प्रतिलिटर ९३.१४ रुपियाँ पुगेको छ। चेन्नईमा डिजेलको मूल्य २.८६ रुपियाँले बढाइएको छ र त्यहाँ अब डिजल प्रतिलिटर ९५.२५ रुपियाँमा उपलब्ध छ।

दिल्लीको प्रीत विहारस्थित भारत पेट्रोलियम पम्पमा एक ग्राहकले यसबारे प्रतिक्रिया दिँदै भने, “हामी यसबारे के गर्न सक्छौं? यी सबै वस्तु अन्य देशहरूबाट आउँछन्। यहाँ उत्पादन हुँदैन। त्यसैले सरकारले जे कदम चालिरहेको छ, त्यो देशको हितमै छ।”

पेट्रोल-डिजेलको मूल्यवृद्धिपछि विपक्षी दलहरूले सरकारको आलोचना गरेका छन्। कांग्रेसले एक्समा लेखेको छ, “महँगी म्यानले जनतामाथि कोर्रा चलायो।” समाजवादी पार्टीका अध्यक्ष अखिलेश यादवले व्यंग्य गर्दै भने, “अगाडि बढ्न चाहनुहुन्छ भने साइकल नै विकल्प हो।”

विशेषज्ञहरूका अनुसार, अन्तरराष्ट्रिय बजारमा काँचो तेलको बढ्दो मूल्यका कारण इन्धन बिक्री गर्ने कम्पनीहरूलाई भइरहेको निरन्तर घाटाबीच पेट्रोल, डिजल र सीएनजीको मूल्य वृद्धि गरिएको हो। अन्तरराष्ट्रिय बजारमा काँचो तेलको मूल्य करिब १०६ डलर प्रतिव्यारेल पुगेको बताइएको छ।

---------------

हिन्दुस्थान समाचार / भवानी थामी