कोलकाता, 15 मई (हि.स.)। प्रवर्तन निर्देशनालय (ईडी) ले सोना पाप्पू प्रकरणमा लामो समयसम्मको सोधपुछपछि कोलकाता पुलिसका उपायुक्त (डीसीपी) शान्तनु सिन्हा विश्वासलाई पक्राउ गरेको छ। केन्द्रिय एजेन्सीले बिहीबार राति उनलाई नियन्त्रणमा लिएको हो। उनलाई शुक्रबार अदालतमा पेश गरिने बताइएको छ।

शुक्रबार बिहान ईडीका एक अधिकारीले उनको पक्राउको पुष्टि गर्दै अनुसन्धानमा उनले पूर्ण रूपमा असहयोग गरेको कारण पक्राउ गर्नुपरेको बताए। स्रोतका अनुसार, बिहीबार बिहानदेखि कोलकातास्थित सीजीओ कम्प्लेक्समा रहेको ईडी कार्यालयमा शान्तनु सिन्हा विश्वाससँग सोधपुछ भइरहेको थियो। करिब साढे १० घण्टासम्म चलेको सोधपुछपछि राति करिब १० बजी उनलाई पक्राउ गरिएको हो।

यसअघि पनि ईडीले सोना पाप्पू प्रकरणमा बयानका लागि शान्तनुलाई पटक-पटक समन पठाएको थियो। उनी निरन्तर समनबाट बच्दै आएको आरोप छ। अनुसन्धान एजेन्सीले उनको निवासमा छापा समेत मारेको थियो। कोलकाता र दिल्लीस्थित ईडी कार्यालयहरूले विभिन्न मुद्दामा उनलाई उपस्थित हुन बोलाएको बताइएको छ। एक मुद्दामा समन पाएपछि उनले कलकत्ता उच्च अदालतको पनि शरण लिएका थिए।

लगातार सोधपुछबाट जोगिन खोजेपछि ईडीले उनीविरुद्ध लुकआउट नोटिससमेत जारी गरेको थियो, ताकि उनी देश छाडेर बाहिर जान नसकून्। अनुसन्धान एजेन्सीका स्रोतहरूले सोना पाप्पू र उनका निकट व्यक्तिहरूसँग शान्तनुको केही आर्थिक कारोबारको सम्बन्ध फेला परेको दाबी गरेका छन्। आर्थिक अनियमितताको आरोपमा पक्राउ परेका व्यवसायी जय कामदारबाट बरामद कागजातहरूमा पनि शान्तनुको नाम भेटिएको बताइएको छ।

गत महिना ईडीले पाप्पू प्रकरणको अनुसन्धानका क्रममा फर्न रोडस्थित शान्तनु सिन्हा विश्वासको घरमा छापा मारेको थियो। उक्त अभियान बिहानदेखि शुरु भएर रातिसम्म चलेको थियो। तलाशीका क्रममा शान्तनु सार्वजनिक रूपमा देखिएका थिएनन्। त्यसको भोलिपल्ट ईडीले शान्तनु तथा उनका दुई छोरा सायन्तन र मनीषलाई सीजीओ कम्प्लेक्समा उपस्थित हुन निर्देशन दिएको थियो, तर उनीहरू उपस्थित भएका थिएनन्।

यसका अतिरिक्त, अप्रेल महिनामा ईडीले उनलाई बालुवा तस्करी प्रकरणको अनुसन्धानमा पनि समन पठाएको थियो। त्यसबेला उनी स्वयं उपस्थित नभई उनका वकिल ईडी कार्यालय पुगेका थिए। स्रोतका अनुसार, उनले अन्य कार्यमा व्यस्त रहेको कारण देखाउँदै एजेन्सीसँग थप समय मागेका थिए। विधानसभा निर्वाचन प्रक्रिया समाप्त भएपछि बिहीबार उनी ईडी कार्यालय पुगेका थिए, जहाँ अबेर राति उनलाई पक्राउ गरिएको हो।

---------------

हिन्दुस्थान समाचार / बिशाल