गान्तोक, 26 मई (हि.स.)। भारतीय निर्वाचन आयोगका उपनिर्देशक अपूर्व कुमार सिंहले आज बलुवाखानीस्थित सिक्किमका मुख्य निर्वाचन अधिकारी (सीईओ) को कार्यालयबाट राज्यका सबै छवटा जिल्लाका जिल्ला सूचना अधिकारीहरूसँग निर्वाचन नामावलीको विशेष गहन पुनरीक्षण (एसआईआर) सम्बन्धी मानक कार्यविधि (एसओपी) को सञ्चार तथा प्रचार विषयमा भिडियो सम्मेलनमार्फत सम्बोधन गरे।
निर्वाचन आयोगद्वारा प्रारम्भ गरिएको विशेष गहन पुनरीक्षण प्रक्रियाको उद्देश्य सबै योग्य नागरिकलाई निर्वाचन नामावलीमा समावेश गर्नुका साथै अयोग्य मतदाता, मृत्यु भएका, स्थानान्तरण भएका तथा अनुपस्थित मतदाताको नाम हटाउने रहेको छ।
भिडियो सम्मेलनका क्रममा उपनिर्देशकले सहभागीहरूलाई एसआईआर प्रक्रियाको उद्देश्यबारे जानकारी गराउँदै यसको सफल सञ्चालन सुनिश्चित गर्न सञ्चार माध्यमहरूको भूमिकामाथि प्रकाश पारे। उनले सञ्चार माध्यममार्फत प्रसारण गरिनुपर्ने जानकारीको स्वरूपबारे पनि विस्तृत रूपमा जानकारी दिँदै एसआईआर प्रक्रियासम्बन्धी सन्तुलित तथा यथार्थ समाचार सम्प्रेषणको महत्त्वमाथि जोड दिए।
उपनिर्देशकले मतदाता योग्यतासम्बन्धी बारम्बार सोधिने प्रश्नहरू, सिक्किममा एसआईआर सञ्चालनको आवश्यकता, ज्येष्ठ नागरिक, बिरामी तथा दिव्याङ्ग मतदाताका लागि गरिएका प्रावधानहरू, साथै प्रवासी मतदातासम्बन्धी विषयमा पनि जानकारी दिए।
यसका अतिरिक्त उपनिर्देशकले मतदान केन्द्रहरूको युक्तिकरण, दाबी तथा आपत्ति दर्ता अवधि, अन्तिम निर्वाचन नामावली प्रकाशन, पुनरावेदन चरण तथा सञ्चार अनुगमन केन्द्रहरूको स्थापना सम्बन्धी विषयमा पनि जानकारी गराए। उनले मस्यौदा निर्वाचन नामावली प्रकाशनको दिन सञ्चालन गरिने गतिविधिहरू, मस्यौदा पूर्व बैठकहरू, डीईओ तथा सीईओका जिम्मेवारीहरू, साथै अन्तिम निर्वाचन नामावली प्रकाशन दिवसका कार्यक्रमहरूबारे प्रकाश पारे।
कार्यक्रममा निर्वाचन विभागकी विशेष सचिव टाशी छोडेन भोटिया, संयुक्त सचिव सोनाम छोकी योन्जोन तथा सिक्किमका मुख्य निर्वाचन अधिकारीको कार्यालयका अधिकारीहरूको उपस्थिति रहेको थियो।
---------------
हिन्दुस्थान समाचार / बिशाल
