गान्तोक, 28 मई (हि.स.)। भारतकी राष्ट्रपति द्रौपदी मुर्मू आफ्नो तीन दिवसीय भ्रमण पूरा गरेर सिक्किमबाट फर्किएकी छन्। मुख्यमन्त्री प्रेमसिंह तामाङले सिक्किमका सम्पूर्ण जनताको तर्फबाट राष्ट्रपति द्रौपदी मुर्मुलाई सौहार्दपूर्ण तथा अविस्मरणीय भ्रमणका लागि हार्दिक कृतज्ञता व्यक्त गरेका छन्।
मुख्यमन्त्री तामाङले आज सामाजिक सञ्जाल फेसबुक पोस्टमा राष्ट्रपतिको उपस्थिति हामी सबैका लागि ठूलो सम्मान र प्रेरणाको स्रोत बनेको उल्लेख गरेका छन्। राष्ट्रपतिले गरेका सिक्किमको उल्लेखनीय प्रगति, शान्तिपूर्ण र सौहार्दपूर्ण समाज, दिगो विकासप्रतिको प्रतिबद्धता तथा यहाँका जनताको सरलता र आतिथ्यताको प्रशंसाले अत्यन्त उत्साहित बनाएको उनले बताएका छन्।उनले भने, 'पर्यावरण संरक्षण, जैविक खेती, शिक्षा तथा समावेशी विकासका क्षेत्रमा सिक्किमले हासिल गरेका उपलब्धिहरूप्रति उहाँले व्यक्त गर्नुभएको प्रशंसाले राज्य र राष्ट्रका लागि हरित, प्रगतिशील तथा समृद्ध भविष्य निर्माणतर्फ निरन्तर अघि बढ्ने हाम्रो संकल्पलाई अझ बलियो बनाएको छ।'मुख्यमन्त्रीले सिक्किमका जनताप्रति देखाएको आशीर्वाद, प्रोत्साहन र स्नेहका लागि राष्ट्रपतिप्रति हार्दिक आभार व्यक्त गरेका छन्। उनको यो भ्रमण यहाँका नागरिकहरूको हृदयमा सधैं स्मरणीय अध्यायका रूपमा रहने बताउँदै उनले राष्ट्रपतिको सुस्वास्थ्य, सुख, समृद्धि तथा राष्ट्रसेवामा निरन्तर सफलताको हार्दिक शुभकामना व्यक्त गरेका छन्।
---------------
हिन्दुस्थान समाचार / बिशाल
