गान्तोक, 15 जून (हि.स.)। राक्दोङ-तिन्तेक बीएसी अन्तर्गत राले खेसेमा बेपत्ता बनेका व्यक्तिको शव फेला परेको छ। मृतक व्यक्तिको नाम टेक बहादुर नेपाल बताइएको छ। 51 वर्षीय मृतक एक दिन अघिदेखि बेपत्ता बनेका थिए।
जिल्ला आपदा प्रबन्धन प्राधिकरण, गान्तोकले आज प्रेस विज्ञप्तिमा भनेको छ, जिल्ला आपदा प्रबन्धन प्राधिकरणलाई राले खेसेका जिल्ला अध्यक्षद्वारा टेक बहादुर नेपाल (५१ वर्ष) हराएको सम्बन्धमा आपत्कालीन सूचना प्राप्त भएको थियो। उनी अघिल्लो दिनदेखि सम्पर्कविहीन तथा बेपत्ता रहेका थिए।
सूचना प्राप्त भएपछि स्थानीय बासिन्दा तथा राक्दोङ-तिन्तेक बीएसीका आपद प्रबन्धन अधिकारीहरूको सहभागितामा व्यापक खोजी अभियान सञ्चालन गरिएको थियो। निरन्तर प्रयासका बावजुद पनि बेपत्ता व्यक्तिलाई फेला पार्न सकिएको थिएन।
यस क्रममा १५ जून, २०२६ को बिहान उक्त क्षेत्रमा एउटा भीरको तलतिर शव झुण्डिएको अवस्थामा देखिएको जानकारी प्राप्त भयो। सो सूचनाको आधारमा राज्य आपदा प्रतिक्रिया बलले जिल्ला आपदा प्रबन्धन प्राधिकरणसँग समन्वय गरी तत्काल खोज तथा उद्धार अभियान सञ्चालन गरेको थियो। संयुक्त प्रयासमार्फत एसडीआरएफ टोलीले कठिन भूभागबाट शव सफलतापूर्वक बाहिर निकाल्यो।
उद्धार टोलीको नेतृत्व हेड कन्स्टेबल तोप्देन लेप्चाले गरेको थियो। अभियानको अनुगमन तथा समन्वय जिल्ला अध्यक्ष बलराम अधिकारी, वार्ड पञ्चायत सदस्य, राब्दाङका एसडीएमको उपस्थितिमा गरिएको थियो।
उद्धार गरिएको शवलाई कानुनी प्रक्रिया तथा आवश्यक थप कार्यवाहीका लागि सम्बन्धित निकायलाई हस्तान्तरण गरिएको छ। जिल्ला प्रशासनले शोकसन्तप्त परिवारप्रति गहिरो समवेदना व्यक्त गर्दै खोज तथा उद्धार कार्यमा संलग्न एसडीआरएफका सुरक्षाकर्मी, स्थानीय बासिन्दा तथा सम्बन्धित अधिकारीहरूको समर्पित प्रयासको प्रशंसा गरेको छ।
---------------
हिन्दुस्थान समाचार / बिशाल
