नयाँ दिल्ली, 17 जून (हि.स.)। महाराष्ट्रको राजनीतिमा फेरि हलचल मच्चिएको छ। धेरै शिव सेना (यूबीटी) सांसदहरू विद्रोही भएको अनुमानबीच पार्टीका वरिष्ठ नेता र राज्यसभा सांसद सञ्जय राउतले कथित विद्रोही सांसदहरूमाथि कड़ा हमला गरेका छन्। उनले पार्टी छोड्न चाहेमा पहिले पदबाट राजीनामा दिएर मात्रै अन्य राजनीतिक निर्णय लिनुपर्ने बताए।

दिल्लीमा आयोजित पत्रकार सम्मेलनमा सञ्जय राउतले पार्टीका केही सांसदलाई पार्टी परिवर्तन गर्न 15-15 करोड़ रुपियाँ दिइएको आरोप लगाएका छन्। यी सांसदहरूलाई पछि चार्टर्ड प्लेन मार्फत विभिन्न ठाउँबाट लगिएको उनको दाबी छ। यद्यपि, उनले आफ्नो आरोपलाई समर्थन गर्ने कुनै प्रत्यक्ष प्रमाण सार्वजनिक गरेनन्।

राउतले पार्टीमा उत्पन्न परिस्थितिलाई मध्यनजर गर्दै भोली बस्ने संसदीय दलको बैठकका लागि ह्वीप जारी गरिएको बताए। बैठकमा सबै सांसदलाई उपस्थित हुन निर्देश दिइएको उनले बताए। उनले यो पनि जानकारी दिए कि पार्टी सांसद अरविन्द सावन्तले यस सम्पूर्ण मामिलामा लोकसभा अध्यक्ष ओम बिरलालाई पत्र लेखेका छन्।

विद्रोही अडान लिने नेताहरुलाई निशाना गर्दै राउतले पार्टीलाई धोका दिनेलाई नछाड्ने बताए। उनले मीडियालाई उनका बयानहरूलाई पूर्णरूपमा देखाउन र सन्दर्भ बाहिर कुनै पनि टिप्पणी प्रसारण नगर्न आग्रह समेत गरेका छन्।

यसै क्रममा सांसद अरविन्द सावन्तले भने, संविधानको रक्षा गर्ने विषयमा हामीले लोकसभा अध्यक्ष ओम बिरलालाई पत्र लेखेका छौं। अहिलेसम्म कुनै पनि पार्टी नेताले पार्टी छाड्ने कुरा भने गरेका छैनन्।

उल्लेखनीय छ कि उद्धव ठाकरे नेतृत्वको शिवसेना (यूबीटी) का 9 लोकसभा सांसदमध्ये 6 देखि 7 जना विद्रोही भएको चर्चा राजनीतिक खेमामा चलिरहेको छ। यी सांसदहरू महाराष्ट्रका उपमुख्यमन्त्री एकनाथ शिन्देको नेतृत्वमा रहेको शिवसेना गुटमा सामेल हुनसक्ने रिपोर्टहरू छन्। लोकसभा अध्यक्षसँग भेटेर छुट्टै संसदीय समूहलाई मान्यता दिने प्रक्रिया शुरु गर्ने पनि छलफल भएको छ।

तर अहिलेसम्म कुनै पनि सांसदले पार्टी छाड्ने घोषणा गरेका छैनन्। यस्तो अवस्थामा सबैको नजर आगामी दिनमा शिवसेना (यूबीटी) को राजनीति र महाराष्ट्रको राजनीतिक समीकरणमा केन्द्रित छ।

हिन्दुस्थान समाचार / भवानी थामी