रामगढ़, २६ जून (हि.स.)। रामगढ़-बोकारो मुख्य सडक (एनएच-२३) अन्तर्गत बारलोङ नजिक बिहीबार राति भएको भीषण सडक दुर्घटनामा ब्याण्ड-ताशा समूहसँग सम्बन्धित सात जनाको मृत्यु भएको छ भने एक जना गम्भीर घाइते भएका छन्। घाइतेलाई प्रारम्भिक उपचारपछि थप उपचारका लागि राँचीस्थित रिम्स अस्पताल पठाइएको छ। दुर्घटनापछि आक्रोशित स्थानीयवासीले एनएच-२३ अवरुद्ध गर्दै सडक सुरक्षासम्बन्धी माग राखेर प्रदर्शन गरे। घटनास्थलमा ठूलो संख्यामा पुलिस परिचालन गरिएको छ।

पुलिसका अनुसार, बलसगरा गाउँका दुई जना र मराङमरचा गाउँका ब्याण्ड-ताशा समूहका सदस्यहरू एक कार्यक्रममा सहभागी हुन सवारी साधनमार्फत मराङमरचा पुगेका थिए। कार्यक्रम सकिएपछि उनीहरू अन्य छ सदस्यसहित बलसगरा फर्किरहेका बेला रामगढ़तर्फबाट तीव्र गतिमा आएको कोइला बोकेको ट्रकले ओभरटेक गर्ने क्रममा सवारी साधनलाई ठक्कर दिएको थियो।

प्रत्यक्षदर्शीका अनुसार, ठक्कर अत्यन्तै शक्तिशाली भएकाले सवारी साधन पूर्ण रूपमा क्षतिग्रस्त भएको थियो र त्यसमा सवार सबै आठ जना गम्भीर घाइते भएका थिए। घटनाको जानकारी पाएलगत्तै स्थानीयवासी, रजरप्पा पुलिस तथा अन्य नजिकका पुलिस टोली घटनास्थल पुगे र सबै घाइतेलाई तत्काल रामगढध सदर अस्पताल पुर्याएका थिए।

रामगढ़ सदर अस्पतालका सिभिल सर्जन डा. अनिल कुमारका अनुसार, अस्पताल ल्याइएका आठ घाइतेमध्ये सात जनालाई चिकित्सकले मृत घोषणा गरे। एक जनाको अवस्था अत्यन्तै गम्भीर रहेकाले उनलाई राँचीस्थित रिम्स अस्पताल रेफर गरिएको छ। मृतकहरूको शव पोस्टमार्टमका लागि अस्पतालको शवगृहमा राखिएको छ।

ब्याण्ड-ताशा समूहका सदस्य पिन्टुका अनुसार, दुर्घटनाग्रस्त सवारी साधनमा कुल आठ जना सवार थिए। तीमध्ये दुई जना बलसगरा र छ जना मराङमरचा गाउँका बासिन्दा थिए। यद्यपि, सबै मृतकको औपचारिक पहिचान प्रक्रिया जारी रहेको बताइएको छ।

रामगढ़का अनुमण्डल पुलिस पदाधिकारी (एसडीपीओ) आलोक रञ्जनले प्रारम्भिक अनुसन्धानमा ट्रक गलत लेन (रङ साइड) मा आएर सवारी साधनलाई ठक्कर दिएको देखिएको जानकारी दिएका छन्। दुर्घटनाको विस्तृत अनुसन्धान जारी रहेको तथा ट्रक चालकको खोजी भइरहेको उनले बताए।

दुर्घटनापछि मृतकका आफन्त र स्थानीयवासीले सडक चौडा गर्न, सडकबत्ती जडान गर्न, डिभाइडर निर्माण गर्न, सीसीटीभी क्यामेरा जडान गर्न तथा स्थायी सडक सुरक्षा उपाय अपनाउन माग गरेका छन्।

स्थिति नियन्त्रणमा लिन एसडीपीओ अनूप रञ्जन, मुख्यालय डीएसपी अकरम रज्जा, रजरप्पा पुलिस निरीक्षक कृष्ण कुमार, रामगढ़ पुलिस निरीक्षक नवीन प्रकाश पाण्डेय, गोला पुलिस निरीक्षक अभिषेक कुमारलगायत ठूलो संख्यामा पुलिस परिचालन गरिएको छ। प्रशासनले स्थानीयसँग वार्ता गर्दै सड़क अवरोध हटाउने र अवस्था सामान्य बनाउने प्रयास गरिरहेको छ। पुलिसले घटनाबारे मुद्दा दर्ता गरी अनुसन्धान शुरु गरेको छ।

---------------

हिन्दुस्थान समाचार / भवानी थामी