कोलकाता, 26 जून (हि.स.)। कोलकाताको तारातला स्थित बी-2 ट्रान्सपोर्ट डिपो रोडमा निर्माणाधीन गोदामको छत भत्किएको झन्डै दुई दिनपछि राहत र उद्धार कार्य जारी छ। ठूला फलामका बीमहरू काटेर र ठूला कंक्रीट स्ल्याबहरू हटाएर भग्नावशेषमा फसेका मानिसहरूको खोजी भइरहेको छ। शुक्रवार बिहान दुर्घटनामा मृत्यु हुनेको संख्या 15 पुगेको छ।

उद्धार टोलीले बुधवार दिउँसोदेखि भग्नावशेषबाट जम्मा 33 जनालाई निकालेको छ। धेरै कामदारहरू अझै पनि भग्नावशेषमुनि फसेको हुनसक्ने आशंका गरिएको छ। बिहिवार राति अबेरसम्म भग्नावशेषबाट थप दुई जनाको शव निकालिएको छ, जसको पहिचान हुनसकेको छैन। एसएसकेएम अस्पतालमा उपचाररत मन्नु कुमार (19) र साहिल सरदार (19) को आज बिहान मृत्यु भयो।

बिहारको मुंगेर निवासी मन्नु कुमारलाई बुधवार भग्नावशेषबाट जीवितै निकालिएको थियो। उनको बिहिवार राति शल्यक्रिया गरियो तर डाक्टरहरूको प्रयासको बावजुद शुक्रवार बिहान उनको मृत्यु भयो।

यसअघि उनका भाइ घी कुमार (17) को पनि दुर्घटनामा मृत्यु भएको थियो भने उनका बुबा अस्पतालमा उपचाररत छन्। यसका साथै घाइते गणेश कालिन्दी (45) को पनि शुक्रवार उपचारको क्रममा मृत्यु भयो।

अहिलेसम्म मृतकहरूको पहिचान कृष्ण चौधरी (30), रोहित चौधरी (40), राहुल चौधरी (17), चन्द्रमा चौधरी (60), पप्पु रजक (40), असगर हुसैन (55), साहिल सरदार (19), घी कुमार (17), हसन इमाम (44), गणेश कालिन्दी (45), नवीन सिंह (44), मन्नू कुमार (19) र स्वपन मण्डल (53) को रूपमा गरिएको छ। दुई जनाको शव अझै पहिचान हुनसकेको छैन।

अठार जना घाइतेहरू अझै पनि एसएसकेएम अस्पतालमा भर्ती छन्। परिवारका सदस्यहरूको दाबी छ कि उनीहरूको परिवारका सदस्यहरू अझै पनि भग्नावशेषमुनि फसेको हुनसक्छ। उद्धार कार्य अन्तर्गत आज बिहान रेलवे ग्यास कटर मेसिनहरू प्रयोग गरेर फलामका बीमहरू काट्ने काम भइरहेको थियो। भग्नावशेषमुनि फसेकाहरूलाई पत्ता लगाउन थर्मल राडार पनि प्रयोग भइरहेको छ। प्रशासनले सबै सम्भावित स्थानहरूको पूर्ण खोजी नभएसम्म राहत र उद्धार कार्य जारी रहने बताएको छ।

हिन्दुस्थान समाचार / भवानी थामी