नयाँ दिल्ली, 0६ जुलाई (हि.स.)। पश्चिम एसियामा जारी तनाउका बीच विश्वको काँचो तेल आपूर्तिको प्रमुख मार्ग मानिने होर्मुज जलडमरूमध्यबाट तेल तथा ग्यास बोकेका जहाजहरूको आवागमन पुनः सहज हुन थालेपछि काँचो तेलको मूल्यमा लगातार गिरावट देखिएको छ। ब्रेन्ट क्रुडको मूल्य प्रति ब्यारेल ७२ अमेरिकी डलरको नजिक पुगेको छ।

अन्तरराष्ट्रिय बजारमा सोमबार कारोबारका क्रममा ब्रेन्ट क्रुडको मूल्य ०.२८ डलर अर्थात् ०.३९ प्रतिशतले घटेर प्रति ब्यारेल ७१.८४ अमेरिकी डलरमा कारोबार भइरहेको छ। त्यस्तै, वेस्ट टेक्सास इन्टरमिडियट (डब्ल्यूटीआई) को मूल्य ०.१८ डलर अर्थात् ०.२६ प्रतिशतले घटेर प्रति ब्यारेल ६८.५१ अमेरिकी डलरमा कारोबार भइरहेको छ।

यसैबीच, ओपेक प्लस राष्ट्रहरूले आगामी महिनादेखि काँचो तेलको उत्पादन बढाउने निर्णय गरेका छन्। साउदी अरेबिया र रुसको नेतृत्वमा रहेका सात देशले दैनिक अतिरिक्त १ लाख ८८ हजार ब्यारेल कच्चा तेल उत्पादन गर्न स्वीकृति दिएका छन्।

आइतबार होर्मुज जलडमरूमध्यबाट तेल तथा ग्यास बोकेका जहाजहरूको आवागमन अघिल्लो अवधिको तुलनामा थप सहज देखिएको छ। युरिया, डीएपी र सल्फर बोकेका १५ भारतीय जहाज सुरक्षित रूपमा होर्मुज पार गरी भारतका विभिन्न बन्दरगाहतर्फ अघि बढिरहेका छन्।

हिन्दुस्थान समाचार / बिशाल