कोलकाता, १६ अगस्त (हि.स.)। वीरभूम जिल्लाको रामपुरहाटका तृणमूल कांग्रेसका पूर्व विधायक तथा पश्चिम बंगाल विधानसभाका पूर्व उपाध्यक्ष आशीष बन्द्योपाध्यायको आइतबार बिहान रहस्यमय परिस्थितिमा मृत्यु भएको छ। उनको शव रामपुरहाट शहरस्थित उनको घरसँगै जोडिएको पार्टी कार्यालयमा झुन्डिएको अवस्थामा फेला परेको हो। घटनापछि क्षेत्रमा सनसनी फैलिएको छ।
स्थानीय बासिन्दाहरूले सबैभन्दा पहिले पार्टी कार्यालयको झ्यालबाट आशीष बन्द्योपाध्यायलाई झुन्डिएको अवस्थामा देखेका थिए। सूचना पाएपछि पुलिस घटनास्थलमा पुग्यो र शवलाई पोस्टमार्टमका लागि पठायो। पुलिस स्रोतका अनुसार, घटनास्थलबाट एउटा सुसाइड नोट पनि बरामद भएको छ।
स्थानीय स्रोतका अनुसार, शनिबार आशीष बन्द्योपाध्यायसँग धेरै पार्टी नेता तथा कार्यकर्ताहरूले भेट गरेका थिए। उनको घर रामपुरहाटको पाँच नम्बर वार्डको हाटतला पाडा क्षेत्रमा रहेको छ। सन् २०२६ को विधानसभा चुनाउमा रामपुरहाटबाट भाजपाका ध्रुव साहासँग चुनाउ हारेपछि आशीष बन्द्योपाध्याय सक्रिय राजनीतिबाट केही हदसम्म टाढिएका थिए।
‘मास्टरमशाई’ नामले चर्चित यी वरिष्ठ नेताको नाम हालै सार्वजनिक भएको कथित भ्रष्टाचारको मामिलासँग पनि जोडिएको थियो। पुलिसले अहिलेसम्म सुसाइड नोटका सम्बन्धमा आधिकारिक रूपमा कुनै विस्तृत जानकारी दिएको छैन। पोस्टमार्टम रिपोर्ट आएपछि तथा पुलिस जाँचको निष्कर्ष सार्वजनिक भएपछि मात्र उनको मृत्युको वास्तविक कारण स्पष्ट हुन सक्नेछ।
हिन्दुस्थान समाचार / भवानी थामी
