गुवाहाटी, १६ अगस्त (हि.स.)। असममा बाढीको प्रभाव अब पाँच जिल्लामा सीमित भएको छ। स्थितिमा तीव्र रूपमा सुधार भइरहेको छ। सबै नदीहरू खतराको चिन्हभन्दा तल बगिरहेका छन्। प्रभावित मानिसहरू आफ्नो जीवनलाई पुनः सामान्य अवस्थामा फर्काउन जोडतोडका साथ प्रयास गरिरहेका छन्। सरकारले सहयोगका सम्भव सबै प्रयास गरिरहेको छ। प्रशासनले मुख्य रूपमा विद्यालयहरूको व्यवस्था पुनः सुचारु गर्न आवश्यक कदम चालिरहेको छ। बाढी प्रभावितहरूका अगाडि ठूलो चुनौती खडा भएको छ।
असम राज्य आपदा व्यवस्थापन प्राधिकरणको १५ अगस्तको तथ्यांकअनुसार, सबै नदीहरू खतराको चिन्हभन्दा तल बगिरहेका छन्। बाढीमा ज्यान गुमाउनेहरूको संख्या १०५ पुगेको छ। बाढीबाट सबैभन्दा बढी क्षति शिवसागर जिल्लामा भएको छ। प्रभावित जिल्लाहरूमा गोलाघाट, होजाई, नगाउँ, शिवसागर र जोरहाट रहेका छन्। यी जिल्लाका १६ राजस्व मण्डलका कुल २३५ गाउँ प्रभावित भएका छन्। हाल राज्यका कुल ६२,४४३ जनसंख्या अझै प्रभावित छन् भने ४,९५४.४३ हेक्टर कृषि भूमि पानीमा डुबेको छ।
राज्य सरकारले बाढी प्रभावित मानिसहरूका लागि अझै पनि कुल २८ वटा राहत शिविर र ९ वटा राहत वितरण केन्द्रसहित कुल ३७ वटा शिविर सञ्चालनमा राखेको छ। राहत शिविरहरूमा ४,८७७ जनाले आश्रय लिएका छन्। राहत वितरण केन्द्रहरूमा ५,८९२ गैर-शिविरवासीले राहत प्राप्त गरिरहेका छन्। बाढीमा राहत तथा उद्धार अभियानमा एसडीआरएफ, डीडीआरएफ, पुलिस, अग्निशमनलगायतका निकायहरू जुटिरहेका छन्। बाढीका कारण ठूलो मात्रामा सडक, पुल तथा अन्य पूर्वाधारमा क्षति पुगेको छ।
हिन्दुस्थान समाचार / भवानी थामी
