सुपौल, २६ अगस्त (हि.स.)। बिहारको सुपौल जिल्लास्थित पिपरा थाना क्षेत्रमा मङ्गलबार अबेर राति भएको सडक दुर्घटनामा पाँच जनाको मृत्यु भएको छ भने एक जना गम्भीर घाइते भएका छन्। दुर्घटना कटैया चोक नजिकै एनएच-३२७ई को बजरङ्गबली मन्दिर छेउमा भएको हो। त्यहाँ करिब छ जना मानिसहरू कीर्तन गरिरहेका थिए। सोही क्रममा एउटा तीव्र गतिमा आएको सवारी साधनले उनीहरूलाई किच्दै करिब ५० मिटर टाढा सडक किनारमा रहेको पसलमा गएर ठोक्किएको थियो।
दुर्घटनामा तिलाई दास (६५), राजु दास (५०), सुरेन्द्र यादव (४५), भुवनेश्वरी यादव उर्फ कोयली यादव र कृष्ण मोहन साहको मृत्यु भएको छ। मृतकहरू कटैया पञ्चायतका निवासी थिए। वहीं रामचन्द्र यादव गम्भीर घाइते छन्। तिलाई दास र राजु दास कटैया पञ्चायतको वार्ड १२, सुरेन्द्र यादव वार्ड १५, भुवनेश्वरी यादव उर्फ कोयली यादव वार्ड ११ र कृष्ण मोहन साह वार्ड १३ का बासिन्दा थिए। दुर्घटनाको खबर पाउनासाथ मृतकका घरहरूमा रुवाबासी चल्यो।
सूचना पाएपछि स्थानीय पुलिस पुगेर सवारी साधनलाई नियन्त्रणमा लिएको छ। पुलिसले दुर्घटनाको कारणबारे अनुसन्धान गरिरहेको छ। मङ्गलबार राति डीएम सावन कुमारले एसडीएमलाई घटनास्थलमा पठाएको र पुलिस आवश्यक कारबाहीमा जुटिसकेको जानकारी दिए।
दुर्घटनाले ग्रामीणहरूमा आक्रोश छाएको छ। बुधबार बिहान ग्रामीणहरूले कटैया चोक नजिकै सडक किनारमा लगाइएका अस्थायी पसलहरू हटाउन शुरु गरे। सडक किनारमा अतिक्रमण र पसलहरू हुनाले दुर्घटनाको जोखिम बनिरहने ग्रामीणहरूको भनाइ छ। ग्रामीणहरूले भविष्यमा यस्ता घटना रोक्नका लागि सडक किनारका अस्थायी पसलहरू हटाउन माग गरेका छन्।
हिन्दुस्थान समाचार / भवानी थामी
