काठमाडौं, ३० अगस्त (हि.स.)। नेपालका प्रधानमन्त्री बालेन्द्र शाहले नेपालमा आएको विनाशकारी बाढीपछि जारी राहत तथा उद्धार अभियानका क्रममा बाढीमा बेपत्ता प्रत्येक व्यक्तिको उद्धारका लागि हरसम्भव प्रयास गरिने बताएका छन्। सरकारले आशाको अन्तिम किरण रहुञ्जेल खोजी तथा उद्धार अभियान जारी राख्ने उनले बताए। साथै, प्रत्येक प्रभावित व्यक्तिको सरकारले पुनर्स्थापना गर्ने प्रतिबद्धता जनाउँदै राहत तथा पुनर्निर्माणप्रति आफ्नो सरकारको प्रतिबद्धता दोहोर्याए।

‘द काठमाडौं पोस्ट’ को रिपोर्टअनुसार, शाहले शनिबार राति फेसबुकमार्फत यस आपदाले पुर्‍याएको क्षतिको जानकारी दिँदै रसुवा, नुवाकोट र धादिङका नदी तटीय तथा तल्लो क्षेत्रमा बसोबास गर्ने समुदायहरू बाढीबाट नराम्ररी प्रभावित भएको बताएका छन्। उनले भने, “प्रभावित प्रत्येक नागरिकको जीवन रक्षा गर्नु सरकारको सर्वोच्च प्राथमिकता हो।”

कठिन भौगोलिक क्षेत्र र प्रतिकूल मौसमबीच सञ्चालन भइरहेको खोज तथा उद्धार अभियानबारे जानकारी दिँदै उनले अहिलेसम्म ७ हजार ५०० भन्दा बढी मानिसलाई सुरक्षित उद्धार गरिएको बताए। उद्धार गरिएकामध्ये विभिन्न जलविद्युत् परियोजनाका साइटमा फसेका २७९ जना कर्मचारीसमेत छन्।

उनका अनुसार, यस बृहत् उद्धार अभियानमा नेपाली सेना, नेपाल पुलिस र सशस्त्र पुलिस बलका १८ हजार ७०८ सुरक्षाकर्मी १६ वटा हेलिकोप्टर (सैनिक तथा निजी) सहित परिचालन भएका छन्। उनीहरूले हालसम्म २३६ वटा उद्धार अभियान सम्पन्न गरिसकेका छन्। भारत र चीनका अन्तरराष्ट्रिय विशेषज्ञहरूले पनि स्थलमै सक्रिय रूपमा सहयोग गरिरहेका छन्।

जोखिमपूर्ण क्षेत्रमा खटिएका अग्रपंक्तिका सुरक्षाकर्मी तथा उद्धारकर्मीहरूको मनोबल उच्च राख्न प्रधानमन्त्रीले परिचालित सुरक्षा बलका लागि दैनिक खाजा भत्ता तथा प्रोत्साहन रकममा तत्काल वृद्धि गर्ने घोषणा गरेका छन्।

शाहले प्रधानमन्त्री राहत कोषमा कमर्सियल खातामार्फत ५.०४ अरब नेपाली रुपियाँ र १.८ मिलियन अमेरिकी डलर जम्मा भएको जानकारी दिए। यसको विवरण आधिकारिक ‘रेस्क्यु रिक्वेस्ट पोर्टल’ मार्फत सार्वजनिक रूपमा हेर्न सकिने उनले बताए। उनले नागरिक तथा दाताहरूलाई ठगीबाट बच्न आधिकारिक सरकारी क्यूआर कोडमार्फत मात्र सहयोग गर्न अपील गरेका छन्।

उनका अनुसार, अन्तरराष्ट्रिय स्तरबाट पनि उल्लेख्य सहयोग प्राप्त भएको छ। जसमा 167 मिलियन यूएसडीको रियायती लोन (वर्ल्ड ब्यांक), 5 मिलियन यूएसडीको ग्राण्टर 150,000 यूएसडीको तकनीकी मदद (एडीबी), 500,000 यूएसडी (अमेरिका), 1 मिलियन एयूडी (अस्ट्रेलिया) र 1 मिलियन स्विस फ्रेंक (यूएनको माध्यमद्वारा स्विट्जरल्याण्ड)।

प्रधानमन्त्री शाहले भारतले ५७.५ टन आपत्कालीन स्वास्थ्य तथा मानवीय सहायता सामग्रीका साथै २ हजार वटा एयरटाइट बडी ब्याग नेपाल पठाएको जानकारी दिए। चीनले पनि यस्तै प्रकारका मानवीय सहायता सामग्री र बडी ब्याग पठाइरहेको उनले बताए। बाढीका कारण नष्ट भएका नदी पार गर्ने संरचनाहरू पुनर्निर्माण गर्न नेपालले चीनसँग औपचारिक रूपमा ३० वटा बेली ब्रिज माग गरेको पनि उनले जानकारी दिए।

शाहले आठ जिल्लाबाट हालसम्म ६७५ जनाको शव बरामद गरिएको पुष्टि गरेका छन्। अन्त्यमा उनले उद्धार अभियान तथा दीर्घकालीन पुनर्निर्माणका लक्ष्य पूर्ण रूपमा हासिल नभएसम्म सरकारी संयन्त्र पूर्ण क्षमताका साथ परिचालित रहने प्रतिबद्धता दोहोर्याए।

हिन्दुस्थान समाचार / बिशाल