क्वेटा, ११ सेप्टेम्बर (हि.स.)। पाकिस्तानको बलोचिस्तानमा स्वतन्त्रता समर्थक सशस्त्र संगठन बलोच लिबरेसन आर्मी (बीएलए) ले ३ सेप्टेम्बरमा पशिनको जियारत क्रसमा पाकिस्तानको सेना र एक निर्माण कम्पनीमाथि गरिएको हमलाको भिडियो आफ्नो आधिकारिक च्यानल हुकलमा सार्वजनिक गरेको छ। भिडियोको शुरुवाती दृश्यमा बीएलएको महत्वपूर्ण शाखा ‘फतह स्क्वाड’ का कमान्डरहरूलाई सैन्य अनुशासनका साथ देखाइएको छ। सबै कमान्डरहरूलाई अत्याधुनिक हतियार र विशेष पोसाकमा देखाइएको छ।
द बलोचिस्तान पोस्टले १० सेप्टेम्बरमा प्रसारित गरेको रिपोर्टअनुसार, सात मिनेट लामो उक्त भिडियोमा ती कमान्डरहरूले भारी हतियार र रकेटबाट पाकिस्तानको सेनाको काफिलामाथि हमला गरेको देखाइएको छ। भिडियोमा सेनाका जवानहरूको शवसमेत देखाइएको छ। बीएलएका अनुसार, ३ सेप्टेम्बरमा फतह स्क्वाडले जियारत क्रस पशिनमा पाकिस्तानको सेनाको काफिलालाई निशाना बनाएको थियो।
यस क्रममा किला सैफुल्लाह स्काउट्स र एफसी १३४ विङका चारवटा गाडीमाथि हमला गरिएको थियो। हमलामा सेनाको एउटा ट्रकसहित दुईवटा गाडी नष्ट भएका थिए। बीएलएका अनुसार, हमलामा पाकिस्तानी सेनाका १८ जना जवान मारिएका थिए र उनीहरूका सबै हतियार कब्जामा लिइएको थियो।
बीएलएका अनुसार, त्यसपछि जियारत क्रस नजिकै खानीबाबामा रहेको एक निर्माण कम्पनीको स्थलमा कब्जा गरी गाडीसहित १४ वटा भारी मेसिनरी नष्ट गरिएको थियो। दुवै घटनाको पाकिस्तानको सेनाले पुष्टि गरिसकेको छ।
हिन्दुस्थान समाचार / बिशाल
