किन्शासा (कङ्गो), 11 सेप्टेम्बर (हि.स.)। अफ्रिकी देश कङ्गोको पूर्वी भागमा रहेको बुकावु शहरमा लागेको आगलागीमा कम्तीमा २७ बालबालिकाको मृत्यु भएको छ। मृतकमध्ये १९ जना बालिका र ८ जना बालक रहेका छन्। आगलागीमा ३०० घर र दुई विद्यालय जलेर नष्ट भएका छन्। दक्षिण किभु प्रान्तको राजधानी बुकावुमाथि रुवान्डाको सेना र उसको एम२३ मिलिसियाको कब्जा रहेको छ। कङ्गो लोकतान्त्रिक गणतन्त्रको आधिकारिक सरकारी समाचार एजेन्सी ‘एजेन्स कङ्गोलाइज डी प्रेसे (एसीपी)’ ले १० सेप्टेम्बरमा प्रसारित गरेको रिपोर्टमा यो जानकारी दिइएको हो।
एसीपीका अनुसार, अस्पताल र विद्यालयका स्रोतबाट प्राप्त प्रारम्भिक जानकारीअनुसार २९ जना घाइते भएका छन्। तीमध्ये १७ जनाको कदुतु जनरल अस्पताल र १२ जनाको कदुतु प्रान्तीय जनरल रेफरल अस्पतालमा उपचार भइरहेको छ। विद्यालयका स्रोतका अनुसार, ३०० भन्दा बढी घरमा आगलागी भएको छ। दुई विद्यालय-बागीरा कम्युनमा रहेको ईपी मोसाला र कदुतु कम्युनमा रहेको ईपी नोंगों पनि प्रभावित भएका छन्। आगलागी कसरी भयो भन्ने यकिन कारण तत्काल पत्ता लाग्न सकेको छैन।
स्रोतका अनुसार, आगो तीन सडक-काशेके, लुगुलु र एलिलासम्म फैलिएको छ। मृतकको संख्या बढ्न सक्ने बताइएको छ। एक स्थानीय बासिन्दाले भने, “हामीलाई बुकावुमा के भइरहेको छ भन्ने थाहा छैन। एक महिनाभित्र आगलागीका १८ घटनामा ५० भन्दा बढी मानिसको मृत्यु भइसकेको छ। हामीलाई सरकारको सहयोग आवश्यक छ। विद्यालयको नयाँ सत्र शुरु हुँदैछ। यस्तो अवस्थामा हामी बालबालिकासँग रात कहाँ बिताउने भन्ने थाहा छैन।
हिन्दुस्थान समाचार / बिशाल
