तेहरान/वासिङ्टन, ११ सेप्टेम्बर (हि.स.)। इरानको इस्लामिक रिभोल्युसनरी गार्ड कर्प्स (आईआरजीसी) ले उसको नौसेनाले होर्मुज जलडमरूमध्यमा अमेरिकाको ‘सेलड्रोन टाइप’ को बिना चालकको जहाजमाथि हमला गरी त्यसका उद्देश्यलाई विफल बनाएको जनाएको छ। यसबीच इरानको प्रबल समर्थक यमनका हुती विद्रोहीहरूले लाल सागरको महत्त्वपूर्ण शहर मोचामाथि कब्जा गरेका छन्। हुतीको यस कदमबाट चिन्तित संयुक्त राष्ट्र सुरक्षा परिषद्ले यमनबारे बैठक गरेको छ।
अल जजिरा र सीबीएस न्युजको रिपोर्टअनुसार, युनाइटेड किङ्डम मेरिटाइम ट्रेड अपरेसन्स सेन्टरले ओमानको तट नजिकै दुईवटा जहाजमा प्रोजेक्टाइल (क्षेप्यास्त्र वा रकेटजस्ता हतियार) प्रहार भएको सूचना प्राप्त भएको जनाएको छ। उता, यमनका हुती विद्रोहीहरूले लाल सागरको महत्त्वपूर्ण शहर मोचामाथि कब्जा गरेका छन्। यससँगै हुतीले विश्वका सबैभन्दा महत्त्वपूर्ण व्यापारिक मार्गमध्ये एक रणनीतिक रूपमा महत्त्वपूर्ण बाब अल-मन्देब जलडमरूमध्यमा आफ्नो नियन्त्रण विस्तार गरेको छ।
संयुक्त राष्ट्र सुरक्षा परिषद्ले यस कब्जाको परिप्रेक्ष्यमा यमनबारे बैठक गरेको छ। संयुक्त राष्ट्रमा यमन सरकारका प्रतिनिधिले क्षेत्रमा छिमेकी देशहरू र नागरिकहरूविरुद्ध ‘हुती आतंकवादी’ समूहको आक्रामकता बढेको बताएका छन्। साउदी अरबका संयुक्त राष्ट्र प्रतिनिधि अब्दुल अजीज अल-वासिलले आफ्नो देशले हुतीका हमलाहरू रोक्न सबै आवश्यक उपाय अपनाएर आफ्नो सुरक्षाको रक्षा गर्ने बताएका छन्।
पाकिस्तानका संयुक्त राष्ट्र प्रतिनिधिले यमनमा बढ्दो संघर्षको व्यापक क्षेत्रमा सम्भावित रूपमा दूरगामी परिणाम हुने बताएका छन्। उनले तत्काल कूटनीतिक समाधानका लागि आग्रह गरेका छन्। त्यसपछि इरानको विदेश मन्त्रालयले एक वक्तव्य जारी गरेको छ। उसले यमनलाई ‘दबाउ, धम्क्याउने र निर्दयी घेराबन्दीबाट मुक्त भएर सम्मानजनक जीवन बिताउने अधिकार रहेको’ बताएको छ। विश्वले यमनको राष्ट्रिय सार्वभौमिकता र क्षेत्रीय अखण्डताको पूर्ण सम्मान गर्नुपर्ने पनि उसले जनाएको छ।
इरानको अर्धसरकारी समाचार एजेन्सी तस्नीममा प्रसारित मन्त्रालयको वक्तव्यमा लगातारको घेराबन्दी र सैन्य सहयोगबाट यमनसँग सम्बन्धित समस्याको समाधान नहुने बताइएको छ। मन्त्रालयले यमनको अवस्थाका सम्बन्धमा कूटनीतिक प्रयास गर्न इरान तयार रहेको पनि जनाएको छ।
अमेरिकाका राष्ट्रपति डोनाल्ड ट्रम्पले बुधबार इरान मध्यावधि निर्वाचनलाई प्रभावित पार्न आतुर रहेको बताएका छन्। उनले मध्यावधि निर्वाचनलगत्तै संघर्ष समाप्त हुने आशा व्यक्त गरेका छन्। उनले पत्रकारहरूसँग भने, ‘मलाई लाग्छ निर्वाचनलगत्तै युद्ध समाप्त हुनेछ, किनभने उनीहरू अब धेरै समयसम्म टिक्न सक्दैनन्।’
हिन्दुस्थान समाचार / बिशाल
