दुबई, १४ सेप्टेम्बर (हि.स.)। भारतकी बायाँहाते स्पिनर एन. श्री चरणीले आइतबार श्रीलंकाविरुद्धको महिला एशिया कप २०२६ को फाइनलमा ठूलो उपलब्धि हासिल गरेकी छन्। उनले एक क्यालेन्डर वर्षमा टी२० अन्तरराष्ट्रिय क्रिकेटमा सर्वाधिक विकेट लिने भारतीय बलरको कीर्तिमान आफ्नो नाममा लेखाएकी छन्।
दुबई अन्तरराष्ट्रिय क्रिकेट स्टेडियममा सम्पन्न फाइनल खेलको १४औँ ओभरमा श्री चरणीले हरशिता समरविक्रमालाई आफ्नै बलमा क्याच आउट गराउँदै पेभिलियन फर्काइन्। यस विकेटसँगै यस वर्ष टी२० अन्तरराष्ट्रियमा उनको विकेट संख्या ३६ पुग्यो र उनले पूनम यादवको भारतीय कीर्तिमान तोडेकी थिइन्।
श्री चरणीले उक्त खेलमा ४ ओभरमा २० रन खर्चेर ४ विकेट लिइन्। यस प्रदर्शनसँगै यस वर्ष टी२० अन्तरराष्ट्रिय क्रिकेटमा उनको कुल विकेट संख्या ३९ पुगेको छ। उनको उत्कृष्ट बलिङकै मद्दतले भारतले श्रीलंकालाई पराजित गर्दै महिला एशिया कपको उपाधि जित्न सफल भयो।
लेग स्पिनर पूनम यादवले सन् २०१८ मा ३५ इनिङ्समा ३५ विकेट लिएकी थिइन्। तर २२ वर्षीया श्री चरणीले मात्र २० इनिङ्समा ३९ विकेट लिएर यो उपलब्धि हासिल गरेकी छन्।
श्री चरणीले महिला एशिया कपको सेमिफाइनलमा बंगलादेशविरुद्ध खेल्दै पूनम यादवको ३५ विकेटको कीर्तिमान बराबरी गरेकी थिइन्। श्रीलंकाविरुद्धको फाइनलमा हरशिताको विकेट लिएसँगै उनी उक्त कीर्तिमानभन्दा अगाडि पुगेकी हुन्।
आन्ध्र प्रदेशकी यी स्पिनरले गत वर्ष अप्रेलमा श्रीलंकाविरुद्ध अन्तरराष्ट्रिय क्रिकेटमा पदार्पण गरेकी थिइन्। महिला प्रिमियर लिगमा दिल्ली क्यापिटल्सका लागि प्रभावशाली प्रदर्शन गरेपछि उनले भारतीय टोलीमा स्थान बनाएकी थिइन्।
त्यसपछि श्री चरणी भारतको एकदिवसीय विश्वकप टोलीको पनि सदस्य बनेकी थिइन्। उनी पहिलो पटक ५० ओभरको महिला विश्वकप जितेर इतिहास रच्ने भारतीय टोलीको हिस्सा समेत रहेकी थिइन्।
हिन्दुस्थान समाचार / बिशाल
