न्युयोर्क, १४ सेप्टेम्बर (हि.स.)। २००३ पछि पहिलोपटक आफ्नै खेलाडीले यूएस ओपन पुरुष एकलको उपाधि जितेको हेर्ने अमेरिकाको आशा फेरि एकपटक टुटेको छ। जर्मनीका अलेक्जेन्डर ज्वेरेवले भारतीय समयअनुसार सोमबार बिहान भएको फाइनलमा अमेरिकाका बेन शेल्टनलाई ६-३, ७-६(२), ५-७, ६-२ ले पराजित गर्दै पहिलोपटक यूएस ओपनको उपाधि जितेका छन्। खेल करिब साढे तीन घण्टासम्म चलेको थियो।
२९ वर्षीय ज्वेरेवको यो करियरको दोस्रो ग्रान्ड स्लाम उपाधि हो। उनले यसै वर्ष फ्रेन्च ओपनको उपाधिसमेत जितेका थिए। छ वर्षअघि फ्लसिङ मिडोजमा भएको आफ्नो पहिलो ग्रान्ड स्लाम फाइनलमा ज्वेरेव दुई सेटको अग्रता हुँदाहुँदै डोमिनिक थिएमसँग पराजित भएका थिए। तर यसपटक उनले त्यस्तो गल्ती दोहोर्याएनन्।
पहिलोपटक कुनै ग्रान्ड स्लाम फाइनल खेलिरहेका शेल्टनले घरेलु दर्शकको समर्थनमा तेस्रो सेट ७-५ ले जित्दै खेलमा फर्कने आशा जगाएका थिए। उनले १२औँ गेममा ज्वेरेवको सर्विस ब्रेक गर्दै सेट आफ्नो नाममा पारे। तर जर्मन खेलाडीले दबाउका बीच आफ्नो संयम कायम राखे।
ज्वेरेवले चौथो सेटको पहिलो गेममै शेल्टनको सर्विस ब्रेक गरे। त्यसपछि सातौँ गेममा अर्को ब्रेक हासिल गर्दै उनले आफ्नो स्थिति थप बलियो बनाए। त्यसपछि शीर्ष वरीयताका ज्वेरेवले सहज रूपमा आफ्नो सर्विस कायम राख्दै उपाधि कब्जा गरे।
अमेरिकी खेलाडीका लागि शुरुवात निकै खराब रह्यो। शेल्टनले पहिलो सर्विस गेममै ब्रेक प्वाइन्टको सामना गर्नुपर्यो र उनले डबल फाल्ट गरे। ज्वेरेवले आफ्नो अनुभवको उत्कृष्ट प्रयोग गरे। यो उनको छैटौँ ग्रान्ड स्लाम फाइनल थियो र उनले दमदार सर्विसमार्फत शेल्टनलाई कुनै अवसर दिएनन्। पूरै खेलमा ज्वेरेवले पहिलो सर्विसपछि ८० मध्ये ६८ अंक अर्थात् ८५ प्रतिशत अंक जिते।
पहिलो सेटको नवौँ गेममा शेल्टनले फेरि ब्रेक प्वाइन्टको सामना गरे र पुनः डबल फाल्ट गरे। त्यसको फाइदा उठाउँदै ज्वेरेवले पहिलो सेट ६-३ ले आफ्नो पक्षमा पारे।
दोस्रो सेटमा शेल्टनले उत्कृष्ट प्रदर्शन गरे र ज्वेरेवको सर्विसमा कुनै ब्रेक प्वाइन्ट सिर्जना हुन दिएनन्। तर टाइब्रेकरमा ज्वेरेवले ५-० को अग्रता बनाउँदै सेट आफ्नो नाममा पारे। उनको शक्तिशाली सर्विसको जवाफ दिने क्रममा शेल्टनको फोरह्यान्ड रिटर्न नेटमा गयो।
शेल्टनले ज्वेरेवविरुद्ध लगातार १२ सेट गुमाएको क्रम तेस्रो सेटमा तोडे। तर उनले त्यसको फाइदा उठाउन सकेनन्। ज्वेरेवले चौथो सेटमा तत्कालै नियन्त्रण कायम गर्दै अन्ततः ऐतिहासिक जित दर्ता गरे।
ज्वेरेवविरुद्धको फाइनलअघि शेल्टनको रेकर्ड ०-५ थियो। दुवै खेलाडीबीच यसअघि कुनै ग्रान्ड स्लाममा भिडन्त भएको थिएन। उनीहरूको पछिल्लो भेट २०२५ को एटीपी फाइनल्समा भएको थियो। शेल्टनले क्वार्टरफाइनल र सेमिफाइनलमा गत च्याम्पियन कार्लोस अल्काराज र आफ्नै देशका फ्रान्सिस टियाफोएलाई पराजित गर्दै फाइनलमा स्थान बनाएका थिए।
यस हारसँगै अमेरिकी पुरुष खेलाडीको यूएस ओपन उपाधिको प्रतीक्षा जारी रहेको छ। अमेरिकाका एन्डी रोडिकले २००३ मा न्युयोर्कमा उपाधि जितेका थिए र त्यसयता कुनै पनि अमेरिकी पुरुष खेलाडीले ग्रान्ड स्लाम उपाधि जित्न सकेका छैनन्। ज्वेरेव ओपन युगमा बोरिस बेकरपछि यूएस ओपन पुरुष एकलको उपाधि जित्ने दोस्रो जर्मन पुरुष खेलाडीसमेत बनेका छन्।
हिन्दुस्थान समाचार / बिशाल
