दुबई, १४ सेप्टेम्बर (हि.स.)। भारतीय महिला क्रिकेट टोलीले उत्कृष्ट प्रदर्शन गर्दै श्रीलंकालाई ७२ रनले पराजित गरी महिला एशिया कप २०२६ को उपाधि आफ्नो नाम गरेको छ। हरमनप्रीत कौरको नेतृत्वमा रहेको भारतीय टोलीले यस जितसँगै प्रतियोगिताको आफ्नो आठौं उपाधि जित्दै अघिल्लो संस्करणको फाइनलमा श्रीलंकासँग बेहोरेको हारको बदला पनि लिएको छ।
टस जितेर पहिले ब्याटिङ गरेको भारतले निर्धारित २० ओभरमा १८३ रनको बलियो लक्ष्य तयार गरेको थियो। भारतको इनिङ्समा ओपनर स्मृति मन्धाना र शेफाली वर्माबीचको उत्कृष्ट साझेदारी मुख्य आकर्षण बन्यो। दुवैले पहिलो विकेटका लागि १२९ रनको साझेदारी गर्दै टोलीलाई मजबुत शुरुआत दिलाए।
मन्धानाले ३९ बलमा ५९ रन बनाइन् भने शेफालीले ३९ बलमै ६८ रनको आक्रामक इनिङ्स खेलिन्। दुवै ब्याटरले अर्धशतक पूरा गर्दै पावरप्लेमा भारतलाई कुनै क्षति बिना तीव्र शुरुआत दिलाएका थिए। प्रारम्भिक साझेदारीले भारतको ठूलो स्कोरको आधार तयार गर्यो। यसबाहेक कप्तान हरमनप्रीत कौरले १४ रन र ऋचा घोषले १७ रनको योगदान दिइन्।
१८४ रनको लक्ष्य पछ्याएको श्रीलंकाली टोली भारतीय बलरहरूको दबाउमा टिक्न सकेन र लक्ष्यभन्दा ७२ रनले पछि पर्यो। श्रीलंकाका लागि कप्तान चमारी अटापट्टुले सर्वाधिक ३६ रन बनाइन्। निलाक्षीका सिल्भाले २२ रन र विष्मी गुणरत्नेले २० रनको संघर्षपूर्ण योगदान दिए।
भारतका तर्फबाट श्री चरणीले उत्कृष्ट बलिङ गर्दै ४ विकेट लिइन् भने दीप्ति शर्माले ३ विकेट लिएर श्रीलंकाली ब्याटिङ लाइनअपलाई धराशायी बनाइन्।
भारतले सन् २००४ मा आयोजित महिला एशिया कपको पहिलो संस्करणमा पनि उपाधि जितेको थियो। अब आठौं पटक ट्रफी जित्दै भारतीय टोलीले यस प्रतियोगितामा आफ्नो वर्चस्व अझ बलियो बनाएको छ। अघिल्लो संस्करणमा श्रीलंकाले फाइनलमा भारतलाई पराजित गर्दै पहिलो पटक उपाधि जितेको थियो।
हिन्दुस्थान समाचार / बिशाल
