नयाँ दिल्ली, १६ सेप्टेम्बर (हि.स.)। कांग्रेसका सञ्चार विभागका प्रभारी महासचिव जयराम रमेशले अमेरिकी ट्यारिफको धम्की, आप्रवासन नियममा कड़ाइ तथा यूपीआईमा व्यापारी छुट दर (एमडीआर) लागू गर्ने निर्णयलाई लिएर बुधवार केन्द्र सरकारको आलोचना गरेका छन्।
उनले भने, अमेरिकी सिनेटबाट पारित भएपछि अब त्यहाँको तल्लो सदनले भारतमाथि १०० प्रतिशतसम्म आयात शुल्क लगाउने प्रावधान रहेको विधेयकमाथि मतदान गर्न गइरहेको छ, जबकि ट्रम्प प्रशासनले भारतीय सूचना प्रविधि (आईटी) पेशेवरमाथि कड़ाइ गर्दै एच–१बी भिसाको लागत बढ़ाइरहेको छ तथा रोजगारी गुमाएपछि तत्काल देशनिकाला गर्ने कड़ा नियम लागू गरिरहेको छ।
जयराम रमेशले बुधवार सामाजिक सञ्जाल ‘एक्स’ मार्फत अमेरिकी प्रतिनिधिसभाले भारतमाथि १०० प्रतिशत आयात शुल्क लगाउने प्रावधान रहेको विधेयकमाथि मतदान गर्न लागेको बताएका छन्। अमेरिकी सिनेटले यसअघि नै उक्त विधेयकलाई स्वीकृति दिइसकेको उनले उल्लेख गरेका छन्।
उनले एकातिर अमेरिकी प्रशासनले भारतीय आप्रवासी तथा सूचना प्रविधि पेशेवरमाथि कड़ाइ गरिरहेको, एच–१बी भिसाको लागत बढ़ाइएको तथा रोजगारी गुमाएपछि तत्काल देशनिकाला गर्ने कड़ा नियम बनाइएको दाबी गर्दै अर्कोतर्फ मोदी सरकार वासिङ्टनसमक्ष पूर्ण रूपमा झुकेको अवस्थामा रहेको आरोप लगाए।
कांग्रेस महासचिवले यूपीआई कारोबारमा शुल्क व्यवस्था लागू गर्ने निर्णयलाई पनि अमेरिकी दबाबसँग जोड्दै अमेरिकी व्यापार प्रतिनिधिले यस वर्षको शुरूआतमा यूपीआई पूर्ण रूपमा निःशुल्क रहेको र त्यसका कारण अमेरिकी कार्ड कम्पनी भिसा तथा मास्टरकार्ड भारतीय बजारबाट बाहिरिनुपरेको विषयमा प्रश्न उठाएको बताए। उनी अनुसार, त्यस दबाबका कारण मोदी सरकारले शून्य एमडीआरको नीति समाप्त गरेको हो।
रमेशले ०.४ प्रतिशत एमडीआर किन निर्धारण गरिएको हो भन्ने प्रश्न समेत उठाएका छन्। डेबिट कार्डमा पनि ०.४ प्रतिशत शुल्क लाग्ने भएकाले यस्तो दर तय गरिएको हो वा अमेरिकी कार्ड कम्पनीलाई भारतीय यूपीआई प्रणालीसँग प्रतिस्पर्धा गर्न सक्षम बनाउन यो निर्णय गरिएको हो भन्ने उनले प्रश्न गरे।
यूपीआईको ‘स्थिरता’का लागि एमडीआर आवश्यक रहेको सरकारको दाबीलाई पनि उनले अस्वीकार गरेका छन्। उनी अनुसार, सम्पूर्ण यूपीआई प्रणाली सञ्चालनको वार्षिक लागत लगभग २० हजार करोड़ रुपियाँ रहेको छ, जुन केन्द्र सरकारको वित्तीय आँकड़ा सन्तुलित देखाउन भारतीय रिजर्भ बैंकले दिने वार्षिक लाभांश हस्तान्तरणको १० प्रतिशतभन्दा पनि कम हो।
/ बिशाल
