नयाँ दिल्ली, १६ सेप्टेम्बर (हि.स.)। प्रधानमन्त्री नरेन्द्र मोदीले बिहीबार नयाँ दिल्लीस्थित यशोभूमिमा बिहान करिब १० बजी तीनदिने अन्तरराष्ट्रिय सम्मेलन तथा प्रदर्शनी ‘सेमिकन इन्डिया २०२६’ को उद्घाटन गर्नेछन्। यस अवसरमा प्रधानमन्त्रीले उपस्थित जनसमुदायलाई सम्बोधनसमेत गर्नेछन्। सेप्टेम्बर १७ देखि १९ सम्म आयोजना हुने सम्मेलनको विषय ‘सिलिकनदेखि प्रणालीसम्म : पारिस्थितिक प्रणालीको निर्माण’ रहेको छ।
प्रधानमन्त्री कार्यालयका अनुसार, सम्मेलनमा सेमीकन्डक्टर तथा विद्युतीय सामग्रीको मूल्य शृङ्खलासँग सम्बन्धित विश्वव्यापी तथा भारतीय उद्योगका साथै नीतिनिर्माता, लगानीकर्ता, शोधकर्ता, स्टार्टअप, शैक्षिक संस्थान र विद्यार्थीहरू एउटै मञ्चमा सहभागी हुनेछन्। भारतमा सहकार्य, लगानी र नवप्रवर्तनलाई प्रोत्साहन गर्नुका साथै सेमीकन्डक्टर क्षेत्रका लागि दक्ष जनशक्ति विकासलाई गति दिनु सम्मेलनको उद्देश्य रहेको छ।
सम्मेलनमा सेमीकन्डक्टर क्षेत्रका साथै प्रदर्शन प्रविधि उद्योगमा भइरहेको प्राविधिक प्रगतिबारे समानान्तर सत्रहरू आयोजना गरिनेछन्। रणनीतिक साझेदारी तथा संयुक्त उद्यमलाई प्रोत्साहन गर्न छ देशका गोलमेच बैठकहरू आयोजना गरिनेछन्। यसका साथै महिला नेतृत्वमा केन्द्रित विशेष सत्रसमेत सञ्चालन गरिनेछ।
‘सेमिकन इन्डिया २०२६’ मा सेमीकन्डक्टर मूल्य शृङ्खलाका सबै प्रमुख चरणलाई एकीकृत रूपमा प्रदर्शन गरिनेछ। यसमा सेमीकन्डक्टर सामग्री तथा उपकरणदेखि चिप डिजाइन, उत्पादन, उन्नत प्याकेजिङ, विद्युतीय सामग्री तथा एकीकृत प्रणालीसम्मको सम्पूर्ण प्रक्रिया समेटिनेछ। यस सम्पूर्ण यात्रालाई प्रदर्शन गर्न विशेष ‘स्यान्ड टू सिलिकन टू सिस्टम्स’ मूल्य शृङ्खला अनुभव केन्द्र तयार गरिएको छ।
आयोजकहरूका अनुसार, सम्मेलनमा ५२ देशका प्रतिनिधिसहित ६०० भन्दा बढी कम्पनी सहभागी हुनेछन्। आयोजनाका क्रममा करिब ५० हजार आगन्तुक पुग्ने अपेक्षा गरिएको छ। यसबाहेक ४०० भन्दा बढी उच्चपदस्थ कार्यकारी तथा १५० भन्दा बढी वक्ताले विभिन्न प्राविधिक तथा रणनीतिक सत्रमा आफ्ना विचार प्रस्तुत गर्नेछन्।
प्रदर्शनीमा जापान, दक्षिण कोरिया, मलेसिया, नेदरल्यान्ड्स, सिङ्गापुर र स्विडेनका विशेष देशीय मण्डप निर्माण गरिएका छन्। यसका अतिरिक्त १२ राज्यका प्रदर्शनी कक्ष, स्टार्टअप उद्यम मण्डप, नवप्रवर्तन प्रदर्शनी, विद्यार्थी ह्याकाथन तथा दक्ष जनशक्ति विकास मण्डप पनि सम्मेलनको हिस्सा हुनेछन्।
हिन्दुस्थान समाचार / भवानी थामी
