नयाँ दिल्ली, २४ सेप्टेम्बर (हि.स.)। पञ्जाबमा भारतीय जनता पार्टीद्वारा सञ्चालन भइरहेको ‘नशामुक्त पञ्जाब’ अभियानको ३० सेप्टेम्बरमा जालन्धरमा समापन हुनेछ। यस अवसरमा केन्द्रिय गृहमन्त्री अमित शाहले जनसभालाई सम्बोधन गर्नेछन्। अभियान अन्तर्गत राज्यका विभिन्न भागबाट निकालिएका चार वटा लागुऔषध विरोधी यात्राहरू पनि सोही दिन जालन्धर पुगेर एकसाथ समापन हुनेछन्।

भारतीय जनता पार्टीका सूत्रहरूले बताए अनुसार, ३० सेप्टेम्बरमा चारवटै यात्रा जालन्धर पुगेपछि समापन कार्यक्रम आयोजना गरिनेछ। त्यसपछि अमित शाहले विशाल जनसभालाई सम्बोधन गर्नेछन्। जालन्धर–फगवाड़ा राजमार्ग नजिकै सभाका लागि स्थान तय भइसकेको छ र संगठनको स्थानीय एकाइले तयारी समेत शुरु गरिसकेको छ।

भारतीय जनता पार्टीका राष्ट्रिय अध्यक्ष नितिन नवीनले १८ सेप्टेम्बरमा पठानकोटको माधोपुरबाट चार वटा अलग-अलग मार्ग हुँदै ‘नशामुक्त पञ्जाब यात्रा’ शुरु गरेका थिए। यी यात्राहरू कूल १३ दिनसम्म चल्नेछन्। यी यात्राहरूलाई राज्यका सबै ११७ विधानसभा निर्वाचन क्षेत्रसम्म पुर्याउने योजना रहेको छ। चारवटै यात्राले मिलेर लगभग ४ हजार किलोमिटर दूरी तय गरिरहेका छन्।

पहिलो यात्राको शुरुआत पठानकोटको माधोपुर स्थित एकता स्थलबाट भएको थियो। अन्य यात्राहरू फतेहगढ़ साहिब, फाजिल्का र तलवण्डी साबोबाट शुरु गरिएका थिए। अभियानको उद्देश्य लागुऔषध विरुद्ध जनचेतना बढ़ाउनु र यस मुद्दामा व्यापक जनसहभागिता तयार गर्नु रहेको बताइएको छ।

यस कार्यक्रमलाई अभियानको अन्तिम चरणका रूपमा हेरिएको छ। त्यस्तै, २०२७ को पञ्जाब विधानसभा निर्वाचनअघि लागुऔषधको मुद्दा राज्यको राजनीतिमा प्रमुख मुद्दा बनेको छ। भारतीय जनता पार्टीले यस अभियानलाई लागुऔषध विरुद्ध सामाजिक जनचेतनासँग जोड्दै राज्यव्यापी रूपमा सञ्चालन गरेको छ। पार्टी नेताहरूले लागुऔषधको समस्यासँग जुध्न केवल कानून–व्यवस्था सम्बन्धी कारबाही पर्याप्त नभएको, बरु जनचेतना, उपचार, पुनर्स्थापना तथा युवाहरूका लागि शिक्षा र रोजगारीका अवसरमा समेत ध्यान दिन आवश्यक रहेको बताएका छन्।

हिन्दुस्थान समाचार / भवानी थामी