कोलकाता, २४ सेप्टेम्बर (हि.स.)। अडानी समूहका अध्यक्ष गौतम अडानीले बिहिवार न्यू टाउनमा प्रस्तावित ‘अडानी आरोग्य मन्दिर’को शिलान्यास समारोहका क्रममा राज्यमा ठूलो लगानी गर्ने घोषणा गरेका छन्। उनले यस स्वास्थ्य परियोजनामा चार हजार करोड़ रुपियाँभन्दा बढ़ी लगानी गरिने र यसबाट १० हजारभन्दा बढ़ी रोजगारीका अवसर सिर्जना हुने अपेक्षा रहेको बताए। यसका साथै उनले ठूलो घोषणा गर्दै आफ्नो समूहले साल २०३५ सम्म पश्चिम बंगालका विभिन्न क्षेत्रमा एक लाख करोड़ रुपियाँभन्दा बढ़ी लगानी गर्ने योजना बनाएको बताए।

न्यू टाउनमा आयोजित भूमिपूजन कार्यक्रममा गौतम अडानीसँग उनकी पत्नी प्रीति अडानी र छोरा करण अडानी पनि सहभागी भए। शिलान्यासका क्रममा ‘अडानी आरोग्य मन्दिर’ दुई हजार बेडको गैर-लाभकारी चिकित्सा संस्थान हुने जानकारी दिइयो। जनसेवालाई ध्यानमा राख्दै यसको कूल बेडमध्ये एक हजार बेड राज्य र केन्द्र सरकारका स्वास्थ्य बीमा योजना अन्तर्गत लाभ पाउन योग्य आर्थिक रूपमा कमजोर वर्गका लागि आरक्षित राखिनेछन्। यस अत्याधुनिक परिसरमा अस्पताल मात्र नभई एउटा चिकित्सा महाविद्यालयका साथै उन्नत अनुसन्धान सुविधा समेत रहनेछ।

राज्यप्रतिको आफ्नो प्रतिबद्धता व्यक्त गर्दै गौतम अडानीले स्वास्थ्य सेवाले व्यक्तिगत जीवन परिवर्तन गर्नसक्ने, त्यस्तै पूर्वाधारले लाखौँ मानिसका लागि उपलब्ध अवसरहरू परिवर्तन गर्नसक्ने बताए। यहीँबाट बंगालप्रतिको आफ्नो ठूलो प्रतिबद्धता शुरु हुने उनले बताए।

आफ्नो दीर्घकालीन योजना अन्तर्गत अडानी समूहले साल २०३५ सम्म बन्दरगाह, रसद, विद्युत् उत्पादन, सड़क, पुल, राजमार्ग, हरित सिमेन्ट र अत्याधुनिक विशाल तथ्याङ्क केन्द्र जस्ता महत्त्वपूर्ण औद्योगिक तथा पूर्वाधार क्षेत्रमा एक लाख करोड़ रुपियाँभन्दा बढ़ी लगानी गर्नेछ। यसबाहेक समूहले कोलकाताको ऐतिहासिक प्रशासनिक भवन ‘राइटर्स बिल्डिङ’को जीर्णोद्धारमा पनि पूर्ण सहयोग गर्ने घोषणा गरेको छ।

बंगालको रणनीतिक अवस्थाको महत्त्वमाथि प्रकाश पार्दै अडानीले यस राज्यमा भारतका औद्योगिक क्षेत्र, पूर्वोत्तर र बंगालको खाड़ीबीच प्रमुख समुद्री तथा रसद सम्पर्कका रूपमा काम गर्ने अपार क्षमता रहेको बताए। उनले यो भौगोलिक अवस्थाले बंगाललाई यस्तो पूर्वाधारगत लाभ प्रदान गर्ने बताए, जसको बराबरी निकै कम क्षेत्रले गर्न सक्छन्। यही कारणले बंगालमा केवल प्रवेशद्वारभन्दा धेरै ठूलो आर्थिक शक्तिका रूपमा विकसित हुने क्षमता रहेको उनले बताए।

हिन्दुस्थान समाचार / भवानी थामी