बेंगलुरु, २४ सेप्टेम्बर (हि.स.)। कर्नाटकका मुख्यमन्त्री डीके शिवकुमारले मुख्य निर्वाचन आयुक्त (सीईसी) ज्ञानेश कुमारको राजीनामा मागेका छन्। साथै उनले हाल भइरहेको विशेष गहन पुनरीक्षण (एसआईआर) प्रक्रिया रद्द गरी मतदाता सूचीको नयाँ प्रक्रियाबाट पुनरीक्षण गराउन माग गरेका छन्।

बिहिवार बेंगलुरुमा सञ्चारमाध्यमसँग कुराकानी गर्दै शिवकुमारले मतदान गर्ने अधिकार जीवन जिउने अधिकार सरह रहेको बताए। उनले आम नागरिकको मतदान अधिकारलाई राजनीतिक उद्देश्यका लागि दुरुपयोग गर्ने प्रयास भइरहेको आरोप लगाए। पश्चिम बंगाल, बिहार लगायत धेरै राज्यमा यस्ता प्रयास गरिएको र अब कर्नाटक सहित अन्य राज्यमा पनि यस्तै भइरहेको उनले बताए। शिवकुमारले यस सम्बन्धमा आफूले बुधवार निर्वाचन आयोगसँग थप समय दिन माग गरेको बताए।

निर्वाचन आयोगका सदस्यहरूबीचको मतभेदको उल्लेख गर्दै शिवकुमारले आयोगलाई प्रदान गरिएको स्वायत्तताको दुरुपयोग भइरहेको आरोप लगाए। उनले बहुमत सदस्य कुनै मतसँग सहमत नभएको अवस्थामा कुनै निर्णय एकतर्फी रूपमा लागू गर्न नसकिने बताए। यस्तो अवस्थामा मुख्य निर्वाचन आयुक्तले नैतिक आधारमा स्वेच्छाले राजीनामा दिनुपर्ने उनले बताए।

डीके शिवकुमारले हाल भइरहेको एसआईआर प्रक्रिया रद्द गरी नयाँ प्रक्रियाबाट पुनरीक्षण गराउन जोड दिए। उनले यो कांग्रेस वा भारतीय जनता पार्टीका मतको विषय नभई प्रत्येक नागरिकको मतदान गर्ने अधिकारको प्रश्न भएको बताए।

मतदाता सूचीको पुनरीक्षणमा प्रयोग हुने प्रपत्र ६, ७ र ८ को उल्लेख गर्दै शिवकुमारले हालको प्रक्रियामाथि प्रश्न उठाए। उनले यसबाट अशिक्षित तथा वञ्चित वर्गका मानिसहरूमा विशेष प्रभाव पर्नसक्ने आरोप लगाए। उनले यो केवल विचारको विषय नभई मौलिक अधिकारको मामिला भएको र आम जनताको आवाज भएको बताए। शिवकुमारले यस विषयमा संसद सहित व्यापक मञ्चमा छलफल हुनुपर्ने बताए।

उनले नयाँ प्रक्रियाबाट एसआईआर गरिनुपर्ने, सबै नागरिकका अधिकार सुनिश्चित गरिनुपर्ने तथा प्रत्येक व्यक्तिको मतदान गर्ने अधिकार सुनिश्चित गर्न सम्पूर्ण परिस्थितिको व्यापक समीक्षा गरिनुपर्ने बताए। साथै, मतदाता सम्बन्धी तथ्याङ्कको पनि पुनः जाँच गरिनुपर्ने उनले बताए।

/ बिशाल