गान्तोक, 28 सेप्टेम्बर (हि.स.)। सिक्किममा पहिलोपटक ‘उद्यमी भरोसा सम्मेलन २०२६’ आयोजना गरिएको छ। वाणिज्य तथा उद्योग विभागको आयोजनामा सोमबार राजधानीको मनन केन्द्रमा सम्पन्न सम्मेलनमा मुख्यमन्त्री प्रेमसिंह तामाङ प्रमुख अतिथिका रूपमा सहभागी भए।
स्थानीय उद्यमीलाई सम्मान गर्ने, नवप्रवर्तनलाई प्रोत्साहन गर्ने तथा युवालाई उद्यमशीलताप्रति प्रेरित गर्ने उद्देश्यले सम्मेलन आयोजना गरिएको थियो।
मुख्यमन्त्री तामाङले कार्यक्रममा उद्यमीहरूको सक्रिय सहभागिताको प्रशंसा गर्दै उद्यमीहरू चुनौतीबीच पनि आफ्नै बाटो बनाउन, व्यवसायिक योजना तयार गर्न र समाधान खोज्न साहस गर्ने व्यक्ति रहेको बताए। उद्यमशीलताका लागि आत्मविश्वास, निरन्तर प्रयास तथा आफ्नै जीविकोपार्जनसँगै अरूका लागि पनि अवसर सिर्जना गर्ने जिम्मेवारीबोध आवश्यक रहेको उनले बताए।
मुख्यमन्त्रीले उद्यमशीलतालाई करियर तथा जीविकोपार्जनको विकल्पका रूपमा अघि बढाइरहेको बताए। यसबाट खुद्रा तथा थोक व्यापार, रेस्टुरेन्ट तथा फास्टफुड, दुग्ध व्यवसाय, जैविक उत्पादन, हस्तकला, खाद्य प्रशोधन, यातायात, प्रविधि तथा विद्युतीय व्यापारलगायत विभिन्न क्षेत्रमा उद्यमीको उदय भइरहेको उनले बताए।
उनले उद्यमीलाई केन्द्रमा राखेर उनीहरूको भविष्यको वृद्धि र विकासमा ध्यान दिन सम्मेलन आयोजना गरिएको बताए। परिवारलाई उद्यमशीलता तथा स्वरोजगारतर्फ अघि बढाउने उद्देश्यसहित ‘एक परिवार, एक उद्यमी’ अवधारणालाई पनि उनले उल्लेख गरे।
उद्यमशीलता ठूला उद्योग वा व्यवसायमा मात्र सीमित नरहेको बताउँदै मुख्यमन्त्रीले घरबाट सञ्चालन हुने साना व्यवसाय, स्थानीय व्यवसाय तथा व्यक्तिगत स्वरोजगारका उद्यम पनि उत्तिकै महत्वपूर्ण रहेको बताए। राज्य सरकारले उद्यमी तथा स्वयं सहायता समूहलाई उपलब्ध गराउँदै आएको आर्थिक सहयोग, सिर्जनात्मक तथा विषयवस्तुमा आधारित अर्थतन्त्रको प्रवर्द्धन र नयाँ उद्यमी विकासका लागि ‘सिक्किम राइज’ जस्ता पहललाई उनले उल्लेख गरे।
सरकारी योजनासम्बन्धी सही जानकारी प्राप्त गर्न सम्बन्धित विभागबाटै जानकारी लिन उद्यमीलाई आग्रह गर्दै उनले विभिन्न योजनाका प्रावधान तथा योग्यताका मापदण्ड अध्ययन गरेर उपलब्ध सहयोगको सही उपयोग गर्न सुझाउ दिए। सिक्किमका धेरै उद्यमी पहिलो पुस्ताका उद्यमी रहेको उल्लेख गर्दै उनले उनीहरूसँग पारिवारिक व्यवसायिक अनुभव वा स्थापित बजार सञ्जाल नहुन सक्ने भएकाले सफलता र असफलता दुवैबाट सिक्न आग्रह गरे।
बजार बुझ्ने, आर्थिक अनुशासन कायम गर्ने, गुणस्तर तथा ग्राहक सन्तुष्टिमा ध्यान दिने र दिगो व्यवसायिक मोडल अपनाउने गरी क्रमिक रूपमा अघि बढ्न उनले सुझाउ दिए। सिक्किममा व्यवसाय दर्ताको संख्या बढ्नुले राज्यमा उद्यमशीलताको संस्कृति विस्तार भइरहेको देखाउने उनले बताए। युवालाई स्थानीय आवश्यकता पहिचान गरी सिक्किममै उत्पादन तथा सेवा विकास गर्न आग्रह गर्दै यसबाट रोजगारी सिर्जना हुनुका साथै आर्थिक मूल्य राज्यभित्रै कायम राख्न सहयोग पुग्ने बताए।
स्थानीय उद्यमलाई थप प्रोत्साहन गर्न ‘स्थानीयका लागि आवाज’ अभियान अपनाउँदै स्थानीय रूपमा उत्पादित वस्तु तथा सेवाको उत्पादन, प्रवर्द्धन र उपभोगमार्फत ‘मेकिङ सिक्किम’ अभियानमा योगदान गर्न उनले आग्रह गरे।
हिन्दुस्थान समाचार / बिशाल
