क्वेटा (बलुचिस्तान), 0३ सेप्टेम्बर (हि.स.)। बलुचिस्तानका पूर्वमुख्यमन्त्री नवाब असलम रायसानीले संघीय सरकारको सैन्य अभियानका क्रममा मेहरगढमा हालै भएको ड्रोन हमलाप्रति गहिरो चिन्ता व्यक्त गरेका छन्। उनले मेहरगढ कुनै एक व्यक्तिको घर नभई बलुचिस्तानको महत्वपूर्ण राष्ट्रिय, ऐतिहासिक तथा कबायली केन्द्र रहेको बताएका छन्। यसलाई पटक-पटक निशाना बनाइनु चिन्ताजनक र निन्दनीय रहेको उनले बताए।

द बलुचिस्तान पोस्टको रिपोर्टअनुसार, नवाब असलम रायसानीले मेहरगढ बलुचिस्तानको ऐतिहासिक विरासत, कबायली एकता र शान्तिको प्रतीक रहेको बताए। यस्ता केन्द्र र मानिसहरूका घरलाई निशाना बनाउनु राष्ट्रिय तथा ऐतिहासिक सम्पदाको अपमान रहेको उनको भनाइ छ। यसबाट मानिसहरूमा घृणाको भावना बढ्ने उनले बताए। उनले हालै मेहरगढमा भएको घटनालगायत बलुचिस्तानमा बढ्दो बल प्रयोगले शान्तिपूर्ण राजनीतिक तथा लोकतान्त्रिक संघर्षको बाटो रोक्ने प्रयास भइरहेको आशंका अझ बलियो बनाएको बताए। सरकारी अधिकारीहरूले इतिहासले राष्ट्रिय सम्पदा र मानिसहरूको घरको अपमानलाई कहिल्यै नबिर्सने कुरा बुझ्नुपर्ने उनले बताए।

पूर्वमुख्यमन्त्री रायसानीले सत्तारूढ पक्षले बलुच विद्रोहका पछाडि भारतको हात रहेको आरोप लगाउने गरेको, तर यो आरोप निराधार रहेको बताए। विद्रोह नागरिकमाथि थोपरिएको दबाउ, अत्याचार र अन्यायबाट उत्पन्न हुने उनको भनाइ छ। उनले भने, “रुख काट्न सकिन्छ, बगैँचा लगाउन सकिन्छ, तर मानिसहरूको हृदयमा उत्पन्न भएको अविश्वास र घृणाका रूखलाई बल प्रयोग गरेर समाप्त गर्न सकिँदैन।” यदि सरकार वास्तवमै बलुचिस्तानमा शान्ति चाहन्छ भने विरोधलाई केवल “देशद्रोह” भन्नुको सट्टा मानिसहरूलाई विरोध गर्न बाध्य पार्ने आधारभूत कारणहरू हटाउनुपर्ने उनले बताए।

नवाब असलम रायसानीले बलुचिस्तान ऐतिहासिक भूमि रहेको र लगातार बल प्रयोग गर्दा परिस्थिति झन् जटिल बन्न सक्ने बताए। देश तथा कबायली अधिकारको रक्षा गर्न शान्तिपूर्ण र राजनीतिक संघर्ष जारी रहनुपर्ने उनको भनाइ छ। साथै, सरकारले बल प्रयोगको सट्टा वार्ता, राजनीतिक संवाद र लोकतान्त्रिक समाधानलाई प्राथमिकता दिनुपर्ने उनले बताए।

उनले बलुचिस्तानका जनता र राज्य दुवैको हितमा तनाउ बढाउनुको सट्टा शान्ति, राजनीतिक संवाद, आपसी विश्वास र परिस्थितिमा सुधारको बाटो अपनाउनु आवश्यक रहेको बताए। स्थायी शान्ति बल प्रयोगबाट नभई न्याय, सम्मान, राजनीतिक समावेशिता र संवादबाट मात्र कायम गर्न सकिने उनले बताए।