गान्तोक, 08 सेप्टेम्बर (हि.स.)। सिक्किम र पश्चिम बंगालबीच अन्तरराज्यीय सहकार्य तथा संस्थागत सम्बन्धलाई अझ सुदृढ़ बनाउने उद्देश्यले सिक्किम सरकारअन्तर्गत सिक्किम लाइभस्टक डेभलपमेन्ट बोर्ड (एसएलडीबी) का प्रमुख कार्यकारी अधिकृत डा. प्रतिक शर्माले कोलकाताको सल्ट लेकस्थित कार्यालयमा पश्चिम बंग गो-सम्पदा विकास संस्थाका प्रमुख कार्यकारी अधिकृत डा. गौरी शंकर कोनारसँग शिष्टाचार भेटवार्ता गरेका छन्।

बैठकमा पशु प्रजनन तथा पशुधन विकासका क्षेत्रमा सिक्किम र पश्चिम बंगालबीच सहकार्यका नयाँ सम्भावनाबारे विस्तृत छलफल भएको बताइएको छ। वैज्ञानिक पशु प्रजनन, आनुवंशिक सुधार, कृत्रिम गर्भाधान, फ्रोजन सिमेन प्रविधि, क्रायोजेनिक सेवा, तरल नाइट्रोजन व्यवस्थापन, प्राविधिक क्षमता अभिवृद्धि तथा अन्य सम्बन्धित विषयहरूमा विशेष रूपमा विचार-विमर्श गरिएको थियो।

छलफलका क्रममा छिमेकी राज्यहरूबीचको सुदृढ़ समन्वयले वैज्ञानिक तथा दिगो पशुधन विकासलाई प्रवर्द्धन गर्न तथा पशुपालक किसानहरूलाई आधुनिक प्रजनन सेवाको प्रभावकारी पहुँच सुनिश्चित गर्न महत्वपूर्ण भूमिका खेल्ने विषयमा जोड दिइएको थियो।

डा. गौरी शंकर कोनारले पशु प्रजनन तथा सम्बन्धित क्षेत्रमा पश्चिम बंगालबाट आवश्यक सबै प्रकारको सहयोग र प्राविधिक सहायता उपलब्ध गराउने प्रतिबद्धता व्यक्त गरे। उनले दुवै राज्यबीच संस्थागत सहकार्य, प्राविधिक आदान-प्रदान तथा विशेषज्ञताको साझेदारीलाई थप विस्तार गर्न इच्छुक रहेको बताए।

डा. प्रतिक शर्माले सिक्किमले आफ्नो पशु प्रजनन पूर्वाधार तथा सेवाहरूलाई अझ सुदृढ़ बनाउने दिशामा काम गरिरहेको उल्लेख गर्दै पश्चिम बंगालसँगको निकट सहकार्यले प्राविधिक सहयोग, ज्ञान आदान-प्रदान तथा क्षमता विकासका लागि महत्वपूर्ण अवसर प्रदान गर्ने बताए। उनले यस्ता साझेदारीबाट पशुपालक किसानहरू प्रत्यक्ष रूपमा लाभान्वित हुने तथा ग्रामीण जीविकोपार्जन सुधारमा समेत योगदान पुग्ने विश्वास व्यक्त गरे।

हिन्दुस्थान समाचार / बिशाल