गान्तोक, 08 सेप्टेम्बर (हि.स.)। सिक्किमका मुख्यमन्त्रीको मार्गदर्शनमा गठित ‘टिम सिक्किम’ ले ३१ अगस्तदेखि ८ सेप्टेम्बर, 2026 सम्म नेपालको बाढी प्रभावित क्षेत्रको नौदिने भ्रमण पूरा गरेको छ। टोलीले त्रिशूली, नुवाकोट र रसुवाका प्रभावित क्षेत्रमा राहत सामग्री वितरण गर्नुका साथै स्थलगत अवस्थाको मूल्याङ्कन गरेको टिम सिक्किम फर नेपालका मुख्य संयोजक सोनाम नोर्गे लाचुङ्पाले बताएका छन्।
टोलीले प्रभावित समुदायका परिवारसँग भेट गरी उनीहरूको अवस्था बुझ्दै कम्बल, स्लिपिङ ब्याग, सौर्य बत्ती, सुक्खा फलफूल, औषधि, साबुन, स्यानिटरी प्याड, डायपर, कपडा, हर्लिक्स तथा अन्य तयारी खाद्य सामग्री वितरण गऱ्यो। बाढीका कारण घर, सम्पत्ति तथा जीविकोपार्जन गुमाएका परिवारलाई प्राथमिकताका आधारमा राहत उपलब्ध गराइएको हो।
टोलीले रसुवा जिल्लामा ३०० भन्दा बढी प्रभावित परिवारलाई राहत सामग्री वितरण गरेको मुख्य संयोजकले जनाएको छ। यसैगरी, नौकुण्ड जुनियर हाईस्कूललाई बिस्कुटका १० प्याकेट तथा शैक्षिक सामग्री उपलब्ध गराइएको छ। कालिका-४ स्थित दुसिनी स्कूलको राहत केन्द्रमा बिस्कुटका ११ प्याकेट तथा सौर्य बत्तीको एक प्याकेट प्रदान गरिएको छ।
टोलीले नुवाकोट र रसुवा जिल्ला प्रशासनलाई औषधि हस्तान्तरण गरेको छ। साथै, एउटा गुम्बा तथा विभिन्न गाउँस्तरीय समितिलाई राहत सामग्री उपलब्ध गराइएको छ। प्रभावित परिवारका बालबालिकालाई भावनात्मक सहयोग तथा शिक्षाको निरन्तरता सुनिश्चित गर्न पुस्तक र खेलौनासमेत वितरण गरिएको छ।
टिम सिक्किमले प्रभावित परिवार, स्थानीय जनप्रतिनिधि तथा समुदायका सदस्यहरूसँग भेट गरी आश्रय, खाद्यान्न, स्वास्थ्य सेवा, शिक्षा तथा अत्यावश्यक सेवासँग सम्बन्धित तत्कालीन आवश्यकताबारे जानकारी लिएको छ। टोलीले सिक्किमका जनताको ऐक्यबद्धता र समर्थन नेपालका प्रभावित समुदायसमक्ष पुर्याउँदै कठिन परिस्थितिमा सिक्किम नेपालसँग दृढतापूर्वक उभिएको सन्देश दिएको छ।
स्थानीय प्रशासन तथा समुदायका प्रतिनिधिसँग समन्वय गर्दै टिम सिक्किमले तत्कालीन मानवीय आवश्यकता तथा दीर्घकालीन पुनर्स्थापना र पुनर्निर्माणका प्राथमिकताबारे स्थलगत मूल्याङ्कन गरेको जनाएको छ। सिक्किमका मुख्यमन्त्रीको मार्गदर्शनमा टिम सिक्किमले राहत, पुनर्स्थापना तथा पुनर्निर्माणका क्षेत्रमा आफ्नो योगदानलाई निरन्तरता दिने जनाएको छ। विशेषगरी तत्काल सहयोग आवश्यक रहेका समुदायलाई प्राथमिकतामा राखिने बताइएको छ।
हिन्दुस्थान समाचार / बिशाल
