मुम्बई, 23 अक्टोबर (हि.स.)। भारतीय महिला क्रिकेट टोलीले महिला एकदिवसीय विश्वकप २०२५ को सेमिफाइनलमा प्रवेश गरेको छ। बिहिबार मुम्बईको डीवाई पाटिल स्टेडियममा न्यूजिल्यान्डविरुद्ध खेलेको वर्षा प्रभावित खेलमा भारतले डीएलएस प्रणालीअनुसार प्रतिद्वन्द्वी टोलीलाई ५३ रनले पराजित गर्‍यो।

पहिले ब्याटिङ गर्दै भारतीय टोलीले तीन विकेटको क्षतिमा ४९ ओभरमा ३४० रनको विशाल स्कोर बनायो। ओपनर स्मृति मन्धनाले ९५ बलमा १० चौका र ४ छक्काको मद्दतले १०९ रन बनाइन् भने प्रतिका रावलले १३४ बलमा १३ चौका र २ छक्काको सहयोगले १२२ रनको शानदार योगदान दिइन्। दुबैबीच पहिलो विकेटका लागि २१२ रनको साझेदारी भयो, जसले टोलीलाई ठूलो स्कोरसम्म पुर्‍यायो।

जवाफमा न्यूजिल्यान्डलाई ४४ ओभरमा परिमार्जित लक्ष्यका रूपमा ३२५ रनको चुनौती दिइयो। टोली २७१ रनमै सीमित रह्यो। ब्रुक हल्यडेले ८१ रन र इसाबेल गेजले नटआउट ६५ रनको पारी खेलिन्। भारततर्फ रेणुका सिंह र क्रान्ति गौडले दुई-दुई विकेट लिए भने स्नेह राणा, श्री चरणी, दीप्ति शर्मा र प्रतिका रावलले एक-एक विकेट हात पारे।

यस जितसँगै भारत विश्वकपको सेमिफाइनलमा पुगेको छ र मन्धना–प्रतिकाको उत्कृष्ट ब्याटिङले दर्शकको मन जित्यो। कप्तानको नेतृत्व र टोलीको सन्तुलित प्रदर्शनले फेरि एकपटक भारतको शक्ति र विश्वकप जित्ने दाबेदारीलाई प्रदर्शित गरेको छ।

हिन्दुस्थान समाचार / भवानी थामी