नयाँ दिल्ली, 25 दिसम्बर (हि.स.)। राष्ट्रपति द्रौपदी मुर्मू, उपराष्ट्रपति सीपी राधाकृष्णन र प्रधानमन्त्री नरेन्द्र मोदीले कर्नाटकको चित्रदुर्ग जिल्लामा भएको दुःखद सड़क दुर्घटनामा गहिरो समवेदना व्यक्त गरेका छन्। दुर्घटनामा धेरै यात्रुको मृत्यु भएको छ भने धेरै जना गम्भीर घाइते भएका छन्। एक्समा आफ्नो सन्देशमा राष्ट्रपतिले चित्रदुर्गमा भएको दुःखद बस आगलागीबाट उनलाई गहिरो दुःख लागेको बताएकी छन्। उनले मृतकहरूका परिवारप्रति समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेका छन्।

दुर्घटनामा शोक व्यक्त गर्दै उपराष्ट्रपतिले सामाजिक संजाल एक्समा चित्रदुर्ग जिल्लामा भएको यस दुःखद सड़क दुर्घटनामा ज्यान गुमाउनेहरूका परिवारप्रति गहिरो समवेदना व्यक्त गरेका छन्। उनले घाइतेहरूको शीघ्र स्वास्थ्यलाभको कामना गरेका छन्।

प्रधानमन्त्री मोदीले मृतकका परिवारप्रति समवेदना व्यक्त गर्दै घाइतेहरूको शीघ्र स्वास्थ्यलाभको कामना गरेका छन्। प्रधानमन्त्री कार्यालय अनुसार प्रधानमन्त्रीले प्रत्येक मृतकका आफन्तलाई 2 लाख रुपियाँ र घाइतेहरूलाई प्रधानमन्त्री राष्ट्रिय राहत कोषबाट 50 हजार रुपियाँ राहत दिने घोषणा गरेका छन्।

कर्नाटकको चित्रदुर्ग जिल्लाको हिरियूर तालुकको गोरलाहट्टु गाउँ नजिकै राष्ट्रिय राजमार्ग 48 मा आज बिहान बेंगलुरुबाट गोकर्ण जाँदै गरेको बस अर्को लरीसँग ठोक्किँदा बसमा आगो लाग्यो र बस पूर्ण रूपमा खरानी भयो।

हिन्दुस्थान समाचार / भवानी थामी