गान्तोक, 02 अप्रेल (हि.स.)। मुख्यमन्त्री प्रेमसिंह तामाङको सहयोगमा सिङताम खामदोङ निर्वाचन समष्टि अन्तर्गत चिसोपानी स्थित नवनिर्माण गरिएको कर्मा थुजी छोइलिङ मोनास्टिक स्कूलको क्षेत्र विधायक तथा राज्य सडक एवं पुल विभागका मन्त्री एनबी दाहालले विधिवत उद्घाटन गरे। यस अवसरमा गुम्पा समितिका अध्यक्ष तथा सिङताम नगर पञ्चायत अध्यक्ष सुरेश कुमार तामाङ, नगर पार्षदगण, गुम्पाका प्रमुख लामा लोपेन लाक्पा छिरिङ तामाङ र अन्य लामाहरू तथा मोनास्टिक स्कूलका विद्यार्थीहरू उपस्थित थिए।
यस केन्द्रको विधिवत रूपमा उद्घाटनपछि मन्त्री दाहालले यो केन्द्र गुम्पा समितिलाई समर्पित गरे। आफ्नो सम्बोधनमा मन्त्री दाहालले यो दुई तल्ले भवन निर्माणको निम्ति सहयोग हेतु मुख्यमन्त्री प्रेमसिंह तामाङप्रति हार्दिक कृतज्ञता व्यक्त गर्दै यसमा योगदान पुऱ्याउने सबैलाई धन्यवाद जनाए। गुणस्तरीय ढंगमा यो भवनको निर्माण भएको उल्लेख गर्दै मन्त्री दाहालले निर्माणपक्षको सराहना गरे।
यसैगरी आफ्नो सम्बोधनमा गुम्पा समितिका अध्यक्ष तथा सिङताम नगर पञ्चायत अध्यक्ष सुरेश कुमार तामाङले यो भवनको निर्माण हेतु विगत वर्ष 2022 को सागा दावाको अवसरमा मुख्यमन्त्री तामाङले 50 लाख रुपियाँ आवण्टन गरिदिएको उल्लेख गर्दै मुख्यमन्त्री, धर्म विभागका मन्त्री सोनाम लामा र मन्त्री एनबी दाहालप्रति गुम्पा समितिको पक्षबाट कृतज्ञता व्यक्त गरे।
यस अवसरमा गुम्पा समितिका सदस्यहरूलाई मन्त्री दाहालले खदा लगाइदिएर सम्मान जनाएका थिए। उल्लेख्य, हाल यस मोनास्टिक स्कूलमा 17 जना विद्यार्थी अध्ययनरत छन्।
हिन्दुस्थान समाचार / बिशाल