गान्तोक, 02 अप्रेल (हि.स.)। सिङताम नगर पञ्चायतको तत्वावधानमा आज सिङताम बजारमा व्यापक सफाई अभियान आयोजना भयो। यो वृहत सफाई अभियानमा दिनभरि नै स्वयं उपस्थित रहेर क्षेत्र विधायक तथा राज्य सडक एवं पुल विभागका मन्त्री एनबी दाहालले सफाई अभियानमा भाग लिए।
मन्त्री दाहालले सफाई अभियानको प्रत्यक्ष निगरानी गर्दै बन्द रहेका नालीहरूको सरसफाई र बजार परिसरको विभिन्न स्थानहरूमा भएको सफाई कार्यको जायजा लिए। आजको यस वृहत सफाई अभियानमा सिङताम नगर पञ्चायत अध्यक्ष सुरेश कुमार तामाङ, मुख्यमन्त्रीका सल्लाहकार रोहितराज महाराज, एमईओ उज्जवल पाण्डे, सीएलसी अध्यक्ष, सिङताम नगर पार्षदगण, सिङताम पुलिसका एसएचओ एसबी मगर, विभिन्न खेल संघका प्रतिनिधिहरू लगायत व्यक्ति विशेषले उत्साहका साथ स्वैच्छिक रूपमा योगदान दिए।
मन्त्री दाहालले मुख्यमन्त्री तामाङको विशेष मार्गनिर्देशनमा यो बृहत सफाई अभियान आयोजना गरिएको जनाउँदै सबैले बडो उत्साहका साथ यो सफाई अभियानमा भाग लिएको जनाए। यसको निम्ति सबै सहभागीहरूप्रति आभार व्यक्त गर्दै मन्त्री दाहालले यस्ता सफाई अभियानलाई निरन्तरता दिन आह्वान गरे। सिङताम नगर पञ्चायत अन्तर्गत कुल पाँचवटा वार्डहरूमा सफाई अभियान आयोजना भएको छ भने पिपलडाँडा देखि चिसोपानी वार्डसम्म सफाई कार्य आज सम्पन्न भएको बताइएको छ।
हिन्दुस्थान समाचार / बिशाल