कोलकाता, 03 अप्रेल (हि. स.)। रक्सी खाने बहानामा बोलाएर एकजना युवकको साथीहरूले हत्या गरिदिए। यस घटनापछि क्षेत्रमा खैलाबैला मच्चिएको छ। घटना दक्षिण 24 परगनाको सोनारपुर थाना क्षेत्र अधिनस्थ सुभाषपाली मैदानमा भएको हो। मृतकको पहिचान विशाल साव (25)-को रूपमा भएको छ जसको विवाह एक वर्ष अगाड़ि मात्र भएको थियो भने घरमा उसकी पत्नी र अढ़ाई महिनाको सन्तान छन्। विशालले चाट पसल संचालन गर्दै आएका थिए।

जानकारी अनुसार गए बुधवार राती लगभग 11 बजे विशाललाई उसको साथी आकाश पाइकले फोन कल गरेर बोलाए। आकाशसित अऩ्य दुईजना साथीहरू क्रमैले राकेश र राहुल पनि थिए। विशालकी पत्नीले उसलाई बाहिर जानदेखि रोकिन्, तर उसले पत्नीको कुरालाई बेवास्ता गर्दै साथीहरूले बोलाएको ठाउँमा गए। आरोप छ, राकेश र राहुलले उसलाई सुभाषपाली मैदानमा लगेर मरूञ्जेल कुटे अनि उसलाई त्यस्तै अवस्थामा छोड़ेर भागे।

परिवारलाई घटनाको जानकारी अबेर राति लगभग एक बजे प्राप्त भयो। परिवारका सदस्यहरूले तत्काल उसलाई सोनारपुर ग्रामीण अस्पतालमा पुऱ्याए, तर उसको गम्भीर अवस्थालाई मध्यनजर गर्दै त्यहाँबाट चित्तरञ्जन अस्पतालमा रेफर गरिदियो। सोही अस्पतालमा उपचारको क्रममा बिहीवार भोर बिहान उसको मृत्यु भयो। स्थानीय मानिसहरूले पुलिसलाई सूचना दिए। सोनारपुर थानाको पुलिसले तत्काल कारबाही गर्दै हत्याको आरोपमा आकाश, राकेश र राहुललाई पक्राउ गरेको छ। पुलिसले सम्पूर्ण मामिलाको गहन जाँच गरिरहेको छ।

हिन्दुस्थान समाचार / उष्णता छेत्री शर्मा