कोलकाता, 03 अप्रेल (हि.स.) । पश्चिम बंगाल पुलिसले गए बुधवार दिनभरि नै अवैध पटाका फ्याक्ट्रीहरूको विरोधमा व्यापक अभियान संचालन गऱ्यो। यो कारबाही दक्षिण 24 परगना जिल्लाको पाथरप्रतिमास्थित एक पटाका फ्याक्ट्रीमा भर्खरै भएको विस्फोटलाई केन्द्र गरेर गरेको हो जसमा आठजना मानिसहरूको ज्यान गएको थियो भने मृतकहरूमा तीनजना नानीहरू पनि सामेल थिए।
दक्षिण 24 परगना जिल्लाका कतिपय क्षेत्रहरूमा पारम्परिक रूपमा पटाका निर्माण गरिन्छ, तर कुनै मामिलामा यस्तो गतिविधि अवैध फ्याक्ट्रीमा संचालन गरिँदैछ। यस्ता अवैध फ्याक्ट्रीहरूमा नाबालिकहरूलाई न्यूनतम वेतन दिएर काममा राखेको आरोप पनि लागेको छ।
जिल्ला पुलिसका एकजना वरिष्ठ अधिकारीले बिहीवार बिहान बताएका छन्, गए बुधवार दिनभरि नै सारा जिल्लामा एकसाथ गरिएको छापामारी अनि खोजी अभियानहरूमा 200 किलोग्राम अवैध पटाका एवं निर्माण सामग्रीहरू जफ्त गरियो। साथै तीनजना मानिसहरूलाई पक्राउ गरियो।
मुख्यमन्त्री ममता ब्यनर्जीले पाथरप्रतिमा विस्फोटप्रति चिन्ता व्यक्त गर्दै पटाका निर्माताहरूको लापरवाहीलाई यसको निम्ति जिम्मेवार ठहराइन्। मुख्यमन्त्रीले यो पनि दाबी गरिन्, उनलाई जानकारी प्राप्त भएको छ कि विस्फोट भएको घरमा भान्सा ग्यास र पटाका बनाउने काँचो माल एउटै कोठामा राखिएको थियो।
अर्कोतिर विस्फोट भएको 48 घण्टा बितिसक्दा पनि घरका दुईजना सह-मालिकमध्ये एकजना तुषार बनिकलाई अहिलेसम्म पक्राउ गर्न सकिएको छैन। उसको दाज्यु चन्द्रकान्त बनिक भने पुलिस हिरासतमा छन्।
उल्लेखनीय छ, यस वर्षको गत फरवरी महिनामा नदिया जिल्लाको कल्याणीस्थित एक पटाका फ्याक्ट्रीमा विस्फोट भएर चारजना मानिसहरूको मृत्यु सहित अन्य धेरैजना घाइते भएका थिए। यसपूर्व वर्ष 2023-मा पूर्व मेदिनीपुर जिल्लाको एगरास्थित एक अवैध पटाका फ्याक्ट्रीमा भएको विस्फोटमा नौजना मानिसहरूको मृत्यु भएको थियो। यसरी नै विगत केही वर्षभित्रमा दक्षिण 24 परगनाको बजबज र उत्तर 24 परगनाको दत्तापुकुरमा भएको यस्तै विस्फोटमा धेरैजना मानिसहरूको ज्यान गइसकेको छ।
हिन्दुस्थान समाचार / उष्णता छेत्री शर्मा