कोभिड महामारीपछि बढ्दो जैविक खतराहरूविरुद्ध भविष्यमा तयार रहन जरुरी

नयाँ दिल्ली, ३० सेप्टेम्बर (हि.स.)। चीफ अफ डिफेन्स स्टाफ (सीडीएस) जनरल अनिल चौहानले मंगलबार भविष्यमा परमाणु हतियारका जैविक खतराहरूविरुद्ध सतर्क रहन र तयारी गर्न आह्वान गरेका छन्। उनले भने, आजको डाटा–केन्द्रित युद्धको युगमा सूचनामा पहुँचले शत्रुलाई हामीमाथि बढत दिलाउन सक्छ। यद्यपि डाटा सुरक्षा र संरक्षण प्रत्यक्ष रूपमा मिलिट्री नर्सिङ सर्भिस (एमएनएस) को जिम्मेवारी होइन, तर यी चुनौतीहरूको जानकारी हुनु आवश्यक छ।

दिल्ली क्यान्टस्थित मानेकशा सेन्टरमा एमएनएसको १००औं स्थापना दिवसको अवसरमा आयोजित वैज्ञानिक सत्रमा सम्बोधन गर्दै जनरल चौहानले भने, “अपरेशन सिन्दूरपछि प्रधानमन्त्रीले भने, भारत परमाणु ब्ल्याकमेलबाट डराउँदैन। हाम्रो तर्फबाट परमाणु हतियार प्रयोगको सम्भावना न्यून छ, तर यसलाई सुरक्षा तयारीमा समावेश गर्नु बुद्धिमानी हुनेछ। रेडियोलोजिकल प्रदूषणको लागि अलग प्रोटोकल आवश्यक हुन्छ र यो हाम्रो तालिमको हिस्सा हुनुपर्छ।”

उनले भने, भारतीय डीएनएको प्रतिरक्षा प्रणाली अद्वितीय छ र विभिन्न वातावरण वा संक्रमणमा फरक प्रतिक्रिया दिन्छ। त्यसैले व्यक्तिगत चिकित्सकीय डाटा जस्तै केस हिस्ट्री, रिपोर्ट, स्वास्थ्य अभिलेख, परिचालन डेटा, तैनाथी र निकासी योजनाहरू सुरक्षित राख्नु अति आवश्यक छ।

जनरल चौहानले कोभिड महामारीपश्चात् विश्वमा मानव निर्मित, आकस्मिक वा प्राकृतिक जैविक खतराहरू बढ्ने सम्भावना रहेको उल्लेख गर्दै त्यसविरुद्ध पूर्वतयारीको आवश्यकता औँल्याए। उनले भने, “यस्ता खतराबाट जोगिन र संक्रमित व्यक्तिहरूको उपचारका लागि फरक उपचार प्रोटोकल आवश्यक हुन्छ। भविष्यमा हामी यसको लागि तयार रहनैपर्छ।”

उनले कठिन परिस्थितिमा नर्सिङ सेवाले देखाएको योगदानको प्रशंसा गर्दै भने, “सैनिक नर्सिङ सेवाले राष्ट्रका लागि १०० वर्षको निःस्वार्थ सेवा पुरा गरिसकेको छ। युद्धको अग्रपंक्तिबाट अस्थायी अस्पताल, समुद्री जहाज र मानवीय मिशनसम्म, नर्सहरूले पीडितलाई आशा र सांत्वना दिएका छन्। मेरो दृढ विश्वास छ—नर्सहरू स्वास्थ्य सेवाको मुटु हुन्, जसले मात्र उपचार होइन, आशा, करुणा र आत्मबल पनि प्रदान गर्छन्।”

उनले तीनै सेनाबीच एकता आवश्यक रहेको भन्दै नर्सिङ स्टाफलाई थलसेना, नौसेना वा वायुसेनामध्ये जुनसुकै एकाइमा सहज रूपमा स्थानान्तरण गर्न सकिन्छ भनी बताए।

---------------

हिन्दुस्थान समाचार / भवानी थामी