बुलावायो, 25 जनवरी (हि.स.)। भारतीय अन्डर–१९ पुरुष क्रिकेट टोलीले २०२६ आईसीसी अन्डर–१९ क्रिकेट विश्वकपमा आफ्नो शानदार प्रदर्शनलाई निरन्तरता दिँदै समूह चरणको वर्षाले प्रभावित खेलमा न्युजिल्यान्डलाई ७ विकेटले पराजित गरेको छ। यो खेल शनिबार जिम्बाब्वेको क्विन्स स्पोर्ट्स क्लबमा सम्पन्न भयो।
पहिले ब्याटिङ गरेको न्युजिल्यान्डको टोली भारतीय बलरहरूको सामु टिक्न सकेन र १३५ रनमै अलआउट भयो। तीव्र गतिका बलर आरएस अम्ब्रिशले घातक बलिङ गर्दै २९ रनमा ४ विकेट लिए, जबकि हेनिल पटेलले ३ महत्वपूर्ण विकेट हात पारे। न्युजिल्यान्डको इनिङ्सको शुरुवात निकै कमजोर रह्यो र टोलीले नियमित अन्तरालमा विकेट गुमायो।
जवाफमा भारतीय टोली आत्मविश्वासका साथ मैदानमा उत्रियो। यद्यपि टोलीले एरन जर्जको विकेट छिट्टै गुमायो, तर त्यसपछि वैभव सूर्यवंशी र कप्तान आयुष म्हात्रेले इनिङ्सलाई सम्हाले। सूर्यवंशीले २३ बलमा ४० रनको आक्रामक इनिङ्स खेले भने म्हात्रेले २७ बलमा ५३ रन बनाउँदै खेलमा भारतको पकड बलियो बनाए।
अन्त्यमा विहान मल्होत्रा (नटआउट १७) र वेदान्त त्रिवेदी (नटआउट १३) ले संयमित ब्याटिङ गर्दै टोलीलाई जितसम्म पुर्याए। भारतले ३ विकेट गुमाएर लक्ष्य पूरा गर्यो।
यस जितसँगै भारतले समूह–बीमा शीर्ष स्थान सुनिश्चित गरेको छ र अब सुपर सिक्स चरणको समूह–२ मा स्थान बनाएको छ, जहाँ इंग्ल्याण्ड, पाकिस्तान, बंगलादेश, न्युजिल्यान्ड र जिम्बाब्वे पनि सहभागी छन्। पाँच पटकको च्याम्पियन भारतीय टोलीले आफ्नो अर्को खेल मंगलबार जिम्बाब्वेसँग खेल्नेछ, जबकि १ फरवरीमा भारत–पाकिस्तानबीच बहुप्रतीक्षित भिडन्त हुनेछ।
हिन्दुस्थान समाचार / भवानी थामी
02 Feb 2026
