मेलबर्न, ३१ जनवरी (हि.स.)। बेल्जियमकी एलिस मर्टेन्सले महिला युगलतर्फ विश्व नम्बर–१ र्‍याङ्किङ पुनः प्राप्तिलाई स्मरणीय बनाउँदै चीनकी झाङ शुआइसँग मिलेर शनिबार अष्ट्रेलियन ओपन २०२६ को उपाधि जितेकी छन्।

फाइनलमा मर्टेन्स–झाङको जोडीले कजाखस्तानकी अन्ना डानिलिना र सर्बियाकी अलेक्जान्द्रा क्रूनिचलाई ७–६ (४), ६–४ ले पराजित गर्‍यो।

फाइनलको पहिलो सेटमा मर्टेन्स र झाङको जोडी ०–३ र त्यसपछि १–४ ले पछि परेको थियो, तर उत्कृष्ट पुनरागमन गर्दै टाइब्रेकमार्फत सेट आफ्नो पक्षमा पार्‍यो। दोस्रो सेटमा यो जोडीले एक समयमा ५–० को अग्रता बनाएको थियो। यद्यपि डानिलिना र क्रूनिचले लगातार चार गेम जित्दै खेललाई रोमाञ्चक बनाए, तर मर्टेन्स र झाङले संयम कायम राख्दै खेल समाप्त गरे।

हाल युगल र्‍याङ्किङमा छैटौँ स्थानमा रहेकी मर्टेन्स—जसले गत वर्ष भेरोनिका कुडरमेटोभासँग विम्बलडन युगल उपाधि जितेकी थिइन्—अष्ट्रेलियन ओपनपछि फेरि विश्व नम्बर–१ बन्नेछिन्। यो बेल्जियम खेलाडीको करियरमा महिला युगलतर्फ शीर्ष स्थानमा रहने कुल ४०औँ हप्ता हुनेछ। यो उपलब्धि फाइनलको नतिजा आउनुअघि नै सुनिश्चित भइसकेको थियो।

मर्टेन्स र झाङ यसअघि २०२२ मा विम्बलडन युगल फाइनल खेलेका थिए भने डानिलिना र क्रूनिच गत वर्ष फ्रेन्च ओपनका उपविजेता बनेका थिए। शनिबारको यो जित मर्टेन्सको करियरको छैटौँ ग्रान्ड स्लाम युगल उपाधि हो। यसअघि उनी २०२१ र २०२४ मा पनि मेलबर्न पार्कमा च्याम्पियन बनिसकेकी थिइन्।

यसअघि शुक्रबार सम्पन्न मिश्रित युगल फाइनलमा अष्ट्रेलियाकी ओलिभिया गाडेकी र जोन पियर्सको जोडीले फ्रान्सकी क्रिस्टिना म्लादेनोभिच र म्यानुअल गुइनार्डलाई ४–६, ६–३, १०–८ ले हराउँदै उपाधि जितेको थियो। यससँगै उनीहरू १९८९ पछि लगातार दुई पटक अष्ट्रेलियन ओपन मिश्रित युगल उपाधि जित्ने पहिलो जोडी बनेका छन्।

---------------

हिन्दुस्थान समाचार / भवानी थामी