भुवनेश्वर, 04 जनवरी (हि.स.)। ओडिशाको ढेंकनाल जिल्लाको मोटाङ्गा थाना क्षेत्र अन्तर्गत एक अवैध ढुंगा खानीमा शनिवार राति भएको ठूलो विस्फोटमा धेरै जनाको मृत्यु भएको आशंका व्यक्त गरिएको छ। यो घटनाले अवैध खानी र अवैध ब्लास्टिङमाथि गम्भीर प्रश्न उठाएको छ।

यो विस्फोट गोपालपुर गाउँ नजिकैको अवैध खानीमा भएको हो। हताहत हुने आशंका गहिरिएको छ तर समाचार लेखुञ्जेलसम्म मृत्यु वा घाइतेको आधिकारिक पुष्टि भएको थिएन। हिजो अबेर राति घटनाको जानकारी पाएपछि स्थानीय प्रशासन र पुलिस टोली तुरुन्तै घटनास्थलमा पुगेर सम्पूर्ण क्षेत्रलाई सुरक्षित बनाएको थियो। मोटंगा थाना पुलिससँगै ओडापाड़ा तहसीलदार घटनास्थलमा पुगेर प्रारम्भिक अनुसन्धान शुरु गरेका थिए। सावधानीका रूपमा क्षेत्रलाई पूर्ण रूपमा सिल गरिएको छ र सार्वजनिक आवागमनमा प्रतिबन्ध लगाइएको छ।

तहसीलदार मोटंगा थाना प्रभारी (आईआईसी) र अन्य वरिष्ठ पुलिस अधिकारीहरू रातभरि घटनास्थलमा रहे र स्थितिको मूल्याङ्कन गरे। अधिकारीहरूले हाल विस्फोटको समयमा खानीमा कुनै कामदार उपस्थित थिए कि थिएन र कोही घाइते, मृत वा भग्नावशेषमा फसेका थिए कि थिएन भनेर निर्धारण गर्ने प्रयास गरिरहेका छन्।

प्रारम्भिक जाँचमा विस्फोट भएको ढुंगा खानीमा वैध ब्लास्टिङ अनुमतिपत्र नभएको पत्तो लागेको छ। आधिकारिक सूत्रहरू अनुसार, ढेंकानाल जिल्ला खानी कार्यालयले 08 सेप्टेम्बर 2025 मा ब्लास्टिङ अनुमतिपत्रको अभावका कारण खानी बन्द गर्न लीजधारकलाई निर्देश जारी गरेको थियो। तरैपनि नियमहरूको उल्लङ्घन गर्दै खानीमा ब्लास्टिङ जारी रह्यो।

हिन्दुस्थान समाचार / भवानी थामी