नयाँ दिल्ली, 05 जनवरी (हि.स.)। केन्द्रिय शिक्षा मन्त्री धर्मेन्द्र प्रधानले सोमबार यहाँ राष्ट्रिय उर्दू भाषा विकास परिषद् (एनसीपीयूएल) द्वारा प्रकाशित पुस्तक ‘ख़ुतबात-ए-मोदी’ को विमोचन गरे। यो पुस्तक सन् २०१४ देखि २०२५ सम्म प्रधानमन्त्री नरेन्द्र मोदीले ऐतिहासिक लाल किल्लाको प्राचीरबाट स्वतन्त्रता दिवसका अवसरमा राष्ट्रका नाममा दिएका सम्बोधनहरूको उर्दू सङ्ग्रह हो।
यस अवसरमा केन्द्रिय मन्त्री प्रधानले लगभग छ करोड उर्दूभाषी नागरिकहरूका लागि प्रकाशित यो पुस्तकले स्वच्छ भारतदेखि विकसित भारतसम्म प्रधानमन्त्रीका विचार, सङ्कल्प र दूरदृष्टिलाई एउटै सूत्रमा बाँधेको बताए। यसले देशका आशा–आकाङ्क्षालाई प्रधानमन्त्रीको दूरदर्शी सोचसँग जोड्ने महत्वपूर्ण काम गर्ने उनले उल्लेख गरे।
प्रधानमन्त्रीका भाषणहरूमा अन्त्योदय, गरिब कल्याण, स्वच्छ भारत, उज्ज्वला योजना लगायत १४० करोड भारतीयका सपना र अपेक्षासँग जोडिएका महत्वपूर्ण विषयहरू समेटिएका छन्, जसलाई यो पुस्तकमार्फत पाठकसम्म प्रभावकारी रूपमा पुर्याइएको छ। यस्ता पुस्तकहरूले नागरिकहरूलाई देशका लक्ष्य, आकाङ्क्षा र प्रधानमन्त्रीको भिजनसँग जोड्ने सशक्त माध्यमको रूपमा काम गर्छन्।
प्रधानले यो पुस्तक देशका प्रत्येक पुस्तकालयसम्म पुग्नुपर्नेमा जोड दिँदै ‘विकसित भारत’ को लक्ष्यलाई लिएर समाजमा व्यापक विमर्श सम्भव हुने विश्वास व्यक्त गरे। साथै, उनले राष्ट्रिय उर्दू भाषा विकास परिषद्लाई भारतको समृद्ध विरासत, संस्कृति र ज्ञान परम्परासँग सम्बन्धित अझ बढी प्रकाशनहरू उर्दू भाषामा ल्याउन सुझाउ दिए।
‘ख़ुतबात-ए-मोदी’ जस्तो सराहनीय प्रकाशनका लागि परिषद्लाई बधाई दिँदै केन्द्रिय मन्त्री प्रधानले यो पुस्तक आम जनता, बुद्धिजीवी र युवाहरूबीच प्रधानमन्त्रीका सङ्कल्प र विचारहरू प्रभावकारी रूपमा पुर्याउन सहयोगी सिद्ध हुने आशा व्यक्त गरे।
हिन्दुस्थान समाचार / बिशाल
