नयाँ दिल्ली, ०७ जनवरी (हि.स.)। दिल्ली उच्च अदालतको निर्देशनअनुसार नगर निगम दिल्ली (एमसीडी) ले बुधबार बिहानै तुर्कमान गेटस्थित फैज–ए–इलाही मस्जिद वरपर, रामलीला मैदान नजिकको अतिक्रमित क्षेत्रमा ध्वस्तीकरण अभियान सञ्चालन गर्‍यो।

अभियान शान्तिपूर्ण र सुचारु रूपमा सम्पन्न होस् भन्ने उद्देश्यले दिल्ली पुलिसले व्यापक कानून–व्यवस्थाका प्रबन्ध गरेको थियो। सम्पूर्ण क्षेत्रलाई नौ जोनमा विभाजन गरिएको थियो, जसको निगरानी अतिरिक्त उपायुक्त पुलिस दर्जाका अधिकारीहरूलाई जिम्मा दिइएको थियो। संवेदनशील स्थानहरूमा पर्याप्त संख्यामा पुलिस बल तैनाथ गरिएको थियो।

संयुक्त आयुक्त पुलिस मधुर वर्माले बताएअनुसार, अभियान अघि शान्ति कायम राख्न र कुनै अप्रिय घटना हुन नदिन अमन कमिटीका सदस्यहरू तथा स्थानीय प्रतिनिधिहरूसँग थुप्रै समन्वय बैठकहरू आयोजना गरिएको थियो। सावधानीस्वरूप सबै आवश्यक निवारक तथा विश्वास बहालीका कदमहरू अपनाइएको थियो।

ध्वस्तीकरणका क्रममा केही असामाजिक तत्वहरूले ढुङ्गामुढा गरी वातावरण बिगार्ने प्रयास गरे, तर पुलिसले हल्का बल प्रयोग गर्दै तत्काल स्थिति नियन्त्रणमा लियो। न्यूनतम र सन्तुलित बल प्रयोगमार्फत स्थितिलाई नियन्त्रणमा ल्याइयो, जसका कारण कुनै ठूलो घटना भएन र क्षेत्रमा सामान्य अवस्था बहाल भयो।

दिल्ली पुलिसले कानून–व्यवस्था कायम राख्दै न्यायालयका आदेशहरूलाई पूर्ण संवेदनशीलता, व्यावसायिकता र कानुनी प्रक्रियाअनुसार कार्यान्वयन गर्न आफू प्रतिबद्ध रहेको स्पष्ट पारेको छ।

उल्लेखनीय छ, दिल्ली नगर निगमले फैज–ए–इलाही मस्जिद नजिक करिब ३८ हजार वर्गफुट जमिनमा अवैध कब्जा भएको भन्दै नोटिस जारी गरेको थियो। उक्त जमिनमा पार्किङ, निजी अस्पतालसहित विभिन्न गतिविधिहरू सञ्चालन भइरहेका थिए। त्यहाँ एक कब्रिस्तान पनि रहेको छ। एमसीडीको नोटिसलाई मस्जिद समितिले अदालतमा चुनौती दिएको थियो, तर उनीहरूले जमिनको स्वामित्वसम्बन्धी कागजात प्रस्तुत गर्न सकेनन्, न त उक्त जमिन वक्फ सम्पत्ति भएको प्रमाणित गर्न सके। यसकारण न्यायालयको आदेशपछि अतिक्रमण हटाउने कारबाही गर्दै जमिनलाई अवैध कब्जाबाट मुक्त गरियो।

---------------

हिन्दुस्थान समाचार / भवानी थामी