कोलकाता, 0१ अक्टोबर (हि.स.)। पश्चिम बंगालका मुख्यमन्त्री शुभेन्दु अधिकारीले दुबईबाट इजरायलको तेल अवीवतर्फ जाँदै गरेको फ्लाईदुबईको उडानमा भएको भयावह घटना तथा विमान अपहरणको प्रयासलाई विफल पार्ने साहसी भारतीय पाइलट क्याप्टेन स्मित मच्छारको अदम्य साहसलाई सलाम गरेका छन्। मुख्यमन्त्रीले पश्चिम बंगालका जनताको तर्फबाट यी वीर सपूतप्रति गहिरो कृतज्ञता व्यक्त गर्दै क्याप्टेन मच्छारले आफ्नो असाधारण पराक्रमबाट सम्पूर्ण देशको गौरव बढाएको बताएका छन्।

आफ्नो आधिकारिक वक्तव्यमा मुख्यमन्त्रीले भनेका छन्, आकाशमा मडारिएको अकल्पनीय संकटबीच ककपिटभित्र चक्कु प्रहार भएर गम्भीर रूपमा घाइते भए पनि क्याप्टेन मच्छारले देखाएको बहादुरी र तत्काल निर्णय गर्ने सुझबुझ अद्वितीय छ। अधिकारीले उनको यस साहसिक कार्यलाई भारतको महान् तथा कालजयी ‘वसुधैव कुटुम्बकम्’ अर्थात् ‘सम्पूर्ण विश्व एक परिवार हो’ भन्ने सभ्यतागत विचारधाराको सच्चा प्रतिबिम्ब बताएका छन्। उनले आफ्नो ज्यानको पर्वाह नगरी निर्दोष मानिसको ज्यान बचाउन प्राथमिकता दिनु उनको पवित्र कर्तव्य भएको र यसले विश्वभरका मानिसको मन छोएको बताएका छन्।

मुख्यमन्त्रीले क्याप्टेन मच्छारको अदम्य साहसले इजरायली नागरिकसहित १७४ जना यात्रु तथा चालक दलका सदस्यको ज्यान मात्र बचाएको नभई आकाशमै गरिएको उनको यस साहसिक कार्यले भारत र इजरायलबीचको मित्रता, विश्वास तथा पारस्परिक सम्मानको ऐतिहासिक सम्बन्धलाई अझ प्रगाढ बनाएको पनि उल्लेख गरेका छन्। राज्यवासीका तर्फबाट शुभकामना दिँदै मुख्यमन्त्रीले क्याप्टेन मच्छारको शीघ्र तथा पूर्ण स्वास्थ्यलाभका लागि ईश्वरसँग प्रार्थना गर्दै उनलाई भारतको सच्चा गौरव बताएका छन्।

हिन्दुस्थान समाचार / बिशाल