गान्तोक, ११ अक्टोबर (हि.स.)। मुख्यमन्त्री प्रेमसिंह तामाङले सोरेङ जिल्लाको जुम रक गार्डनमा आयोजित अन्तरराष्ट्रिय डाउनहिल माउन्टेन बाइकिङ शृङ्खलामा साहस, सहनशीलता र खेलकुद उत्कृष्टताको भावना प्रत्यक्ष अनुभव गर्न पाउँदा खुशी व्यक्त गरेका छन्।
मुख्यमन्त्रीले आज सामाजिक सञ्जालमार्फत आफ्नो विचार साझा गर्दै जुम रक गार्डनमा आयोजित उक्त कार्यक्रम जाबरवान एक्स्ट्रिमले जुम ग्राम प्रशासनिक एकाईसँगको सहकार्यमा आयोजना गरेको बताएका छन्।
मुख्यमन्त्रीले सोरेङ जिल्लाको दुर्गम क्षेत्रमा अवस्थित जुम गाउँमा साहसिक पर्यटन र दिगो विकासको प्रचुर सम्भावना रहेको उल्लेख गरेका छन्। उनले मनमोहक प्राकृतिक दृश्य, प्राकृतिक पदमार्ग र चुनौतीपूर्ण भौगोलिक बनावटले भरिपूर्ण यस क्षेत्रलाई पर्वतीय साइकल दौड तथा अन्य साहसिक खेलकुदको आकर्षक गन्तव्यका रूपमा विकास गर्न सकिने बताएका छन्।
आठ देशका खेलाडीको सहभागिता रहेको यस अन्तरराष्ट्रिय स्तरको शृङ्खलामा सिक्किमका तीन जना खेलाडीले समेत भाग लिएका थिए। यसले पर्वतीय साइकल दौडप्रतिको बढ्दो आकर्षण र साहसिक खेलकुदको गन्तव्यका रूपमा सिक्किमको अपार सम्भावनालाई उजागर गरेको मुख्यमन्त्रीले बताएका छन्।
यस्ता कार्यक्रमले खेलाडीहरूलाई आफ्नो क्षमता, सीप र दृढता प्रदर्शन गर्ने अवसर प्रदान गर्नुका साथै सिक्किमलाई अन्तरराष्ट्रिय खेलकुद मानचित्रमा स्थापित गर्न सहयोग पुर्याउने उनले उल्लेख गरेका छन्। यसले पर्यटन प्रवर्द्धन गर्नुका साथै स्थानीय समुदायका लागि रोजगारी तथा आर्थिक अवसर सिर्जना गर्न पनि मद्दत गर्ने उनको भनाइ छ।
यस्ता आयोजनाले दुर्गम गाउँहरूले समेत आफ्नो विशिष्ट प्राकृतिक सम्पदा र स्थानीय सम्भावनाका आधारमा अन्तरराष्ट्रिय पहिचान बनाउन सक्ने सन्देश दिएको मुख्यमन्त्रीले बताएका छन्।
उनले कार्यक्रमलाई साहस, उत्साह र खेलकुद भावनाको उत्सव बनाउन योगदान पुर्याउने आयोजक, सहभागी खेलाडी तथा सबै सम्बन्धित व्यक्तिहरूको प्रशंसा गरेका छन्। साथै, अन्तरराष्ट्रिय मञ्चमा सिक्किमको प्रतिनिधित्व गर्ने स्थानीय खेलाडीहरूप्रति विशेष सम्मान व्यक्त गरेका छन्।
मुख्यमन्त्रीले यस पहलले थप युवालाई साहसिक खेलकुदमा सहभागी हुन प्रेरित गर्ने र सिक्किमलाई पर्वतीय साइकल दौड तथा साहसिक पर्यटनको अग्रणी गन्तव्यका रूपमा स्थापित गर्न सहयोग पुर्याउने विश्वास व्यक्त गरेका छन्।
उनले सबै सहभागी खेलाडीहरूलाई सफलताको शुभकामना दिँदै सुरक्षित रूपमा खेल्न र साहसिक खेलकुदको भावना कायम राख्न आग्रह गरेका छन्।
हिन्दुस्थान समाचार / बिशाल
