गान्तोक, ०२ अक्टोबर (हि.स.)। गॉंधी जयन्ती २०२६ को अवसरमा सिक्किम सरकारको शहरी विकास विभागले राज्यभर यान्त्रिक सरसफाई सेवा सुदृढ गर्दै हातले ढल सफा गर्ने कार्य उन्मूलन गर्ने राज्यको प्रतिबद्धतालाई सहयोग पुर्याउने उद्देश्यले अत्याधुनिक ढल तथा फोहोर संकलन उपकरणहरू सञ्चालनमा ल्याएको छ।
उपकरण सञ्चालन शुभारम्भ कार्यक्रममा सिक्किमका राज्यपाल ओमप्रकाश माथुर मुख्य अतिथि र मुख्यमन्त्री प्रेमसिंह तामाङ विशेष अतिथिका रूपमा उपस्थित थिए। कार्यक्रममा शहरी विकास तथा खाद्य एवं नागरिक आपूर्ति मन्त्री भोजराज राई, विभिन्न सम्बन्धित विभागका मन्त्रीहरू, शहरी विकास विभागका सल्लाहकार, विधायकहरू, मुख्य सचिव, शहरी विकास विभागका आयुक्त एवं सचिव आदि उपस्थित थिए।
शहरी विकास विभागद्वारा जारी प्रेस विज्ञप्तिका अनुसार, टोयोटा किर्लोस्कर मोटर प्रालिको आर्थिक वर्ष २०२६-२७ को संस्थागत सामाजिक उत्तरदायित्व कार्यक्रमअन्तर्गत उपलब्ध गराइएका यी उपकरणहरूको कुल मूल्य करिब ६.१ करोड रुपियाँ रहेको छ। उपकरणहरूमा मिनी जेटिङ मेसिन, रोबोटिक ढल सफाई उपकरण, म्यानहोलबाट मैला हटाउने मेसिन, नाला सफाई मेसिन, मिनी एक्स्काभेटर, रक ब्रेकर, बन्द संरचनाका फोहोर बोक्ने ट्रक तथा फोहोर थिच्ने मेसिन रहेका छन्।
यी उपकरण सञ्चालनमा ल्याइनुले यान्त्रिकीकरणमार्फत सरसफाई पूर्वाधार सुदृढ गर्ने, जोखिमपूर्ण रूपमा हातैले गरिने कामलाई न्यूनीकरण गर्ने तथा सरसफाई कर्मचारीहरूको सुरक्षा, मर्यादा र स्वास्थ्य-कल्याण अभिवृद्धि गर्ने दिशामा महत्त्वपूर्ण कदमको शुरुआत रहेको छ।
यस पहलले सुरक्षित, मर्यादित र यान्त्रिक सरसफाई सेवा प्रवर्द्धन गर्दै जोखिमपूर्ण मानवीय हस्तक्षेप घटाउन तथा सिक्किममा हातले ढल सफा गर्ने कार्य उन्मूलन गर्ने प्रयासलाई थप सहयोग पुर्याउने बताइएको छ।
हिन्दुस्थान समाचार / बिशाल
