नयाँ दिल्ली, २२ अक्टोबर (हि.स.)। दिल्लीको जन्तर-मन्तरमा कथित अनधिकृत प्रवेश तथा सरकारी आदेश उल्लङ्घनसँग सम्बन्धित मामिलामा दिल्ली पुलिसको अपराध शाखाले ककरोच जनता पार्टी (सीजेपी) का नेता सौरव दास, आशुतोष रांका र अजिंक्य शिन्देलाई सोधपुछका लागि बोलाएको छ।
प्रारम्भिक जानकारीअनुसार, यो मामिला अक्टोबर १३ मा जन्तर-मन्तरमा भएको विरोध प्रदर्शनसँग सम्बन्धित छ। उक्त घटनापछि दिल्ली पुलिसले कारबाही गर्दै दुईवटा छुट्टाछुट्टै प्रथम सूचना प्रतिवेदन (एफआईआर) दर्ता गरेको थियो। हाल यस मामिलाको अनुसन्धान अपराध शाखाले गरिरहेको छ।
दिल्ली पुलिसका अनुसार, अक्टोबर १३ मा सौरव दास, आशुतोष रांका, अजिंक्य शिन्देसहित सीजेपीका अन्य ११ सदस्य जन्तर-मन्तर पुगेका थिए। प्रदर्शनकारीहरूले निजी परिसर हुँदै प्रदर्शनस्थलका रूपमा तोकिएको क्षेत्रबाहिर प्रवेश गरेको पुलिसको आरोप छ। पुलिसले उनीहरूलाई रोक्ने प्रयास गरे पनि प्रदर्शनकारीहरूले अवरोधक नाघेको र पुलिस अधिकारीहरूलाई आफ्नो कर्तव्य निर्वाह गर्न बाधा पुर्याएको आरोप लगाइएको छ। यस क्रममा प्रदर्शनकारीहरूले राष्ट्रिय झण्डा फहराउनुका साथै नाराबाजीसमेत गरेका थिए। घटनापछि सबै १४ जनालाई नियन्त्रणमा लिइएको थियो।
यस घटनासम्बन्धमा पुलिसले दुईवटा छुट्टाछुट्टै एफआईआर दर्ता गरेको थियो।
पहिलो एफआईआर नयाँ दिल्लीको कनाट प्लेस पुलिस थानामा दर्ता गरिएको थियो। यसमा भारतीय न्याय संहिताको धारा २२३ अन्तर्गत सार्वजनिक सेवकको वैध आदेशको अवज्ञा, धारा ३३२ अन्तर्गत अपराध गर्ने उद्देश्यले अनधिकृत रूपमा घर वा परिसरमा प्रवेश तथा धारा ६१(२) अन्तर्गत आपराधिक षड्यन्त्रसम्बन्धी आरोप समावेश छन्।
दोस्रो एफआईआर संसद मार्ग पुलिस थानामा दर्ता गरिएको थियो। यो मामिला कथित रूपमा पुलिसकर्मीको काममा अवरोध पुर्याउने, उनीहरूमाथि आक्रमण गर्ने तथा चोट पुर्याउने आरोपसँग सम्बन्धित छ।
दिल्ली पुलिसले दुवै मामिलाको अनुसन्धान अपराध शाखालाई सुम्पिएको छ। अनुसन्धानका क्रममा घटनाका गतिविधि तथा सम्बन्धित आरोपहरूको छानबिन भइरहेको छ।
जन्तर-मन्तरको घटनाभन्दा अघि अक्टोबर १० मा पनि सौरव दास र आशुतोष रांकालाई अर्को विरोध प्रदर्शनका सिलसिलामा नियन्त्रणमा लिइएको थियो। त्यसबेला शान्ति कायम राख्ने प्रतिबद्धतासहित उनीहरूले एक वर्ष अवधिको बन्धपत्र भरेका थिए।
अक्टोबर १३ को घटनापछि पुलिसले दुवै नेताले पहिले दिएको आश्वासन उल्लङ्घन गरेको आरोप लगाएको थियो। त्यसपछि अक्टोबर १४ मा उनीहरूलाई पाँच दिनका लागि न्यायिक हिरासतमा पठाइयो। पछि हिरासत अवधि थप दुई दिन बढाइयो। अर्का नेता अजिंक्य शिन्देलाई भने रिहा गरिएको थियो।सीजेपीले आफ्ना नेताहरूलाई पक्राउ गर्ने तथा हिरासतमा राख्ने कारबाहीलाई गैरकानुनी ठहर गरेको छ। पार्टीले जमानतदारसम्बन्धी प्रक्रियामाथि पनि प्रश्न उठाउँदै अदालतको आदेशलाई चुनौती दिने बताएको थियो।
यद्यपि, पुलिसले भने कानुन-व्यवस्था कायम राख्न तथा कथित उल्लङ्घनका घटनालाई ध्यानमा राखेर कारबाही गरिएको जनाएको छ।
हिन्दुस्थान समाचार / Bhawani Thami
22 Oct 2026
