काठमाडौं, २९ अक्टोबर (हि.स.)। चक्रवात ‘अर्नब’ को सम्भावित प्रभावबाट हुन सक्ने क्षति न्यूनीकरण गर्न नेपाल नागरिक उड्डयन प्राधिकरणले हवाई सुरक्षासम्बन्धी सावधानी अपनाउन आग्रह गरेको छ। प्राधिकरणले बिहीबार सुरक्षा परिपत्र जारी गर्दै हवाई सेवा प्रदायक, विमानस्थल सञ्चालक, वायुसेवा कम्पनी तथा अन्य सम्बन्धित निकायलाई आवश्यक सतर्कता अपनाउन निर्देशन दिएको छ। प्राधिकरणका अनुसार, यस मौसमी प्रणालीका कारण नेपालको हिमाली तथा उच्च पहाडी क्षेत्रमा मध्यमदेखि भारी वर्षा, मेघगर्जन, तीव्र हावाहुरी र हिमपात हुन सक्ने सम्भावना छ।

प्राधिकरणले २९ र ३० अक्टोबरमा विशेष सतर्कता अपनाउन सुझाउ दिएको छ। भारी वर्षा, तीव्र हावा र कम दृश्यताका कारण विमान उडान तथा अवतरण, विमानस्थल सञ्चालन र धावनमार्गको अवस्था प्रभावित हुन सक्ने जनाइएको छ। प्रतिकूल मौसमको सामना गर्न प्रभावकारी उडान व्यवस्थापन योजना तयार पार्न तथा आवश्यकताअनुसार अन्य उड्डयन निकायसँग समन्वय गर्न हवाई यातायात व्यवस्थापनसम्बन्धी निकायलाई निर्देशन दिइएको छ।

मौसमको अवस्था निर्धारित सञ्चालन सीमाभन्दा प्रतिकूल भएमा उडानको मार्ग परिवर्तन गर्ने, विमानलाई तोकिएको क्षेत्रमा प्रतीक्षा गराउने वा अन्य आवश्यक सञ्चालनसम्बन्धी उपाय अपनाउन भनिएको छ। सुरक्षा परिपत्रमा हावाको दिशा र गतिमा अचानक परिवर्तन हुने अवस्था, वायुमण्डलीय अस्थिरता तथा मेघगर्जनसम्बन्धी जानकारी उडानमा रहेका र उडानका लागि तयारी अवस्थामा रहेका विमानसम्म तत्काल पुर्‍याउन पनि निर्देशन दिइएको छ।

मौसमको अवस्था निर्धारित सञ्चालन सीमाभन्दा प्रतिकूल भएमा उडानको मार्ग परिवर्तन गर्ने, विमानलाई तोकिएको क्षेत्रमा प्रतीक्षा गराउने वा अन्य आवश्यक सञ्चालनसम्बन्धी उपाय अपनाउन भनिएको छ। सुरक्षा परिपत्रमा हावाको दिशा र गतिमा अचानक परिवर्तन हुने अवस्था, वायुमण्डलीय अस्थिरता तथा मेघगर्जनसम्बन्धी जानकारी उडानमा रहेका र उडानका लागि तयारी अवस्थामा रहेका विमानसम्म तत्काल पुर्‍याउन पनि निर्देशन दिइएको छ।

यसका साथै, सबै सम्बन्धित निकायलाई हवाई मार्गनिर्देशन सेवा तथा हवाई यातायात व्यवस्थापनसँग सम्बन्धित महत्त्वपूर्ण पूर्वाधार पूर्ण रूपमा सञ्चालनयोग्य अवस्थामा राख्न भनिएको छ। यसमा वैकल्पिक विद्युत् आपूर्ति र सञ्चार प्रणालीसमेत समावेश छन्। प्राधिकरणले गम्भीर जोखिम, सञ्चालनमा अवरोध वा सुरक्षासम्बन्धी कुनै घटना भएमा निर्धारित माध्यमबाट तत्काल जानकारी गराउन पनि निर्देशन दिएको छ।

हिन्दुस्थान समाचार / बिशाल