सिलगढी, २९ अक्टोबर (हि.स.)। शान्तिनगरको पञ्चानन रोड क्षेत्रमा एक स्वर्ण व्यवसायीलाई हतियार देखाएर लुटपाट गरिएको घटना बिहिवार सार्वजनिक भएको छ। पसल बन्द गरेर घर फर्किरहेका उत्तम सरकारलाई चार जना बदमाशले निशाना बनाउँदै सुन र नगदले भरिएको झोला खोसेर फरार भएको आरोप छ। विरोध गर्दा व्यवसायीमाथि कुटपिट गरिएको थियो भने भाग्ने क्रममा उनीमाथि गोली समेत प्रहार गरिएको थियो। यद्यपि, उनी गोली लाग्नबाट जोगिएका छन्।
पीड़ित उत्तम सरकार अनुसार, बुधवार राति पसलबाट फर्किएपछि घरको मुख्य ढोका खोलेर भित्र पस्न लाग्दा अचानक चार जना युवक उनको अगाड़ी आए। उनले केही बुझ्न नपाउँदै बदमाशहरूले उनको झोला खोसे। विरोध गर्दा उनलाई नालीमा खसालियो। त्यसपछि स्थानीय पसले र बासिन्दाहरूको सहयोगमा बदमाशहरूलाई पछ्याउने प्रयास गरियो।
आरोप अनुसार, दुईवटा मोटरसाइकलमा सवार भएर भागिरहेका बदमाशहरूले व्यवसायीलाई लक्षित गरी गोली चलाए। यस क्रममा घरअगाड़ी रहेका अर्का एक पसलेलाई पनि बन्दुक देखाएर धम्क्याइयो। पीड़ित अनुसार, लुटिएको झोलामा लगभग २०० ग्राम सुन र डेढ़देखि दुई लाख रुपियाँ नगद थियो।
घटनाको सूचना प्राप्त हुनासाथ आशीघर पुलिस चौकीका पुलिस घटनास्थलमा पुगे। पुलिसले घटनामा संलग्न आरोपीहरूको पहिचान गर्न क्षेत्रका विभिन्न स्थानमा जड़ान गरिएका सीसीटीभी क्यामेराको फुटेज जाँच गरिरहेको छ।
हिन्दुस्थान समाचार / भवानी थामी
