धुबडी (असम), ३० अक्टोबर (हि.स.)। भुटानमा हिमताल फुटेपछि असमको धुबडी जिल्लासँगै पश्चिम बङ्गालका विभिन्न क्षेत्रमा बाढीको खतरा उत्पन्न भएको छ। भुटानको गासा जिल्लाको लाया क्षेत्रमा अवस्थित शिन्ताफु हिमताल बिहीबार अबेर साँझ फुटेपछि तालबाट ठूलो मात्रामा पानी अचानक तीव्र गतिमा पुनात्साङछु नदीमा बग्न थालेको छ। यसका कारण भुटानबाट भारततर्फ बग्ने संकोश नदीको जलस्तर अचानक बढ्ने अनुमान गरिएको छ। बाढीको सम्भावित जोखिमलाई ध्यानमा राख्दै गुवाहाटीस्थित एनडीआरएफको पहिलो बटालियन, एसडीआरएफ तथा अन्य सम्बन्धित निकायहरूलाई कुनै पनि परिस्थितिको सामना गर्न तयारी अवस्थामा रहन निर्देशन दिइएको छ।

यसैबीच, केन्द्र सरकारले असमको धुबडी जिल्लासँगै पश्चिम बङ्गालका अलिपुरद्वार र जलपाइगढी जिल्लाका केही क्षेत्रका लागि चेताउनी जारी गरेको छ। यसैगरी, पश्चिम बङ्गालको कुचबिहार जिल्लाका तूफानगञ्ज र बक्सिरहाट क्षेत्रमा एनडीआरएफ तथा एसडीआरएफका उद्धार टोलीहरू तैनाथ गरिएको छ।

संकोश नदी किनारमा बसोबास गर्ने मानिसहरूलाई सतर्क रहन, बालबालिका तथा पशुधनलाई सुरक्षित स्थानमा राख्न र प्रशासनको निर्देशन पालना गर्न आग्रह गरिएको छ। गुवाहाटीस्थित एनडीआरएफको पहिलो बटालियनले शुक्रबार उक्त घटनालाई ध्यानमा राख्दै केन्द्र सरकारले असम र पश्चिम बङ्गालका लागि विशेष सतर्कता जारी गरेको जनाएको छ। सम्भावित परिस्थितिको सामना गर्न एनडीआरएफका टोलीहरूलाई तत्काल उद्धार तथा प्रतिकार्यका लागि तयारी अवस्थामा रहन निर्देशन दिइएको छ। धुबडी जिल्ला प्रशासनले पनि एनडीआरएफ, प्रहरी तथा अन्य सम्बन्धित निकायहरूलाई आवश्यक तयारी गर्न निर्देशन दिएको छ।

एनडीआरएफका स्रोतहरूका अनुसार, भारतीय दूतावासबाट प्राप्त जानकारीमा भुटानको पुनात्साङछु नदीमा अवस्थित शिन्ताफु हिमतालमा हिमताल विस्फोटजन्य बाढी (ग्लोफ) को घटना भएको उल्लेख छ।

पुनात्साङछु नदी (भारतमा संकोश नदीका रूपमा चिनिन्छ) को माथिल्लो क्षेत्रमा अचानक आएको बाढीका कारण भारतको पश्चिम बङ्गालको अलिपुरद्वार र असमको धुबडी जिल्लामा नदीको जलस्तर अचानक बढ्न सक्ने सम्भावना छ। बाढीको पानी नदीको बहावको दिशामा अघि बढ्दै ६ देखि ८ घण्टाभित्र भारतको सीमासम्म आइपुग्ने अनुमान गरिएको छ। यसबाट पश्चिम बङ्गालको अलिपुरद्वार र असमको धुबडी जिल्ला प्रभावित हुन सक्ने सम्भावना रहेको छ।

पश्चिम बङ्गाल र असमका यी दुवै जिल्लामा संकोश नदी किनारमा रहेका स्थानीय प्रशासनलाई सतर्क रहन, परिस्थितिमाथि कडा निगरानी राख्न तथा आवश्यक सावधानीका उपायहरू अपनाउन सुझाउ दिइएको छ।

हिन्दुस्थान समाचार / भवानी थामी