मियामी (फ्लोरिडा), ०८ नोभेम्बर (हि.स.)। अर्जेन्टिनाका दिग्गज फुटबल खेलाडी लियोनेल मेसीले लगातार दोस्रो सिजन मेजर लिग सकर (एमएलएस) को गोल्डेन बुट अवार्ड जित्दै नयाँ कीर्तिमान कायम गरेका छन्। इन्टर मियामीका कप्तान मेसीले २०२६ को नियमित सिजनमा २६ गोल गर्दै यो उपलब्धि हासिल गरेका हुन्। उनी एमएलएस इतिहासमा लगातार दुईपटक गोल्डेन बुट जित्ने पहिलो खेलाडी बनेका छन्।
मेसीले यस सिजन २६ गोलसँगै १७ गोल सहयोग (असिस्ट) पनि गरेका छन्। यससँगै उनको कुल गोल योगदान ४३ पुगेको छ। गोल्डेन बुटको दौडमा उनले एफसी डलासका पिटर मूसा (२२ गोल) र न्यासभिल एससीका सेम सरिज (२१ गोल) लाई पछि पारे।
शनिबार शार्लोट एफसीविरुद्ध नियमित सिजनको अन्तिम खेलमा इन्टर मियामी ३-३ को बराबरीमा रोकिएको थियो। घरेलु मैदानमा मियामीले ३-० को अग्रता बनाए पनि शार्लोटले उत्कृष्ट पुनरागमन गर्दै खेल बराबरी गरेको थियो। उक्त खेलमा मेसीले भने गोल गर्न सकेनन्।
एमएलएसका अनुसार, मेसी लगातार दुईपटक गोल्डेन बुट जित्ने पहिलो खेलाडी हुनुका साथै दुईपटक यो पुरस्कार प्राप्त गर्ने छैटौँ खेलाडी पनि बनेका छन्। यसअघि ब्राडली राइट-फिलिप्स, क्रिस वन्डोलोव्स्की, जेफ कनिङ्घम, टेलर ट्वेलम्यान र प्रेकीले दुई-दुईपटक यो सम्मान प्राप्त गरेका थिए।
मेसीले २०२५ मा २९ गोल र १९ गोल सहयोगसहित गोल्डेन बुट जितेका थिए। यस सिजन पनि उनको उत्कृष्ट प्रदर्शनले इन्टर मियामीको आक्रमणलाई बलियो बनाएको छ। नियमित सिजनमा इन्टर मियामीले लिगकै सर्वाधिक ८० गोल गरेको थियो।
गोल्डेन बुट जितेपछि मेसीको नजर अब एमएलएसको सर्वाधिक मूल्यवान् खेलाडी (एमभीपी) पुरस्कारमा रहेको छ। उनी लगातार तेस्रोपटक यो सम्मान जित्ने पहिलो खेलाडी बन्न सक्नेछन्।
मेसी र इन्टर मियामीले नियमित सिजन दोस्रो स्थानमा रहेर समाप्त गरेका छन्। अब टोली एमएलएस कप प्लेअफमा आफ्नो उपाधि रक्षा गर्ने लक्ष्यसहित मैदानमा उत्रनेछ। ३९ वर्षको उमेरमा पनि मेसीले आफ्नो उत्कृष्ट प्रदर्शनलाई निरन्तरता दिँदै फुटबलमा नयाँ कीर्तिमान कायम गरिरहेका छन्।
हिन्दुस्थान समाचार / बिशाल
