गान्तोक, 12 फरवरी (हि.स.)। नियमन शिथिलीकरण तथा अनुपालन न्यूनीकरण अभ्यासको दोस्रो चरणमाथि कार्यदल समीक्षा बैठक आज टाशीलिङ सचिवालयको सम्मेलन कक्षमा सम्पन्न भयो। कार्यक्रमको अध्यक्षता भारत सरकारको क्याबिनेट सचिवालयअन्तर्गत नेशनल अथोरिटी केमिकल वेपन्स कन्भेन्सन (एनएसीडल्ब्यूसी) की अध्यक्ष रोली सिंह र सिक्किम सरकारका मुख्य सचिव रविन्द्र तेलाङले संयुक्त रूपमा गरेका थिए।
आफ्नो स्वागत सम्बोधनमा राज्य वाणिज्य तथा उद्योग विभागकी सचिव कर्मा डी. युत्सोले नियमन शिथिलीकरण तथा अनुपालन न्यूनीकरण अभ्यासको पहिलो चरण अन्तर्गत सम्पन्न कार्यहरूको संक्षिप्त विवरण प्रस्तुत गरिन्। उनले सबै सम्बन्धित विभागहरूले आफ्ना प्रतिबद्धता सफलतापूर्वक पूरा गरेको र मुख्य सचिवको मार्गदर्शनमा पहिलो चरणमा उल्लेखनीय प्रगति हासिल भएको जानकारी गराइन्। उनले दोस्रो चरणको सफल कार्यान्वयनका लागि निरन्तर सहयोग र समन्वयको अपेक्षा व्यक्त गरिन्।
बैठकलाई सम्बोधन गर्दै अध्यक्ष सिंहले सुशासन प्रक्रियामा निरन्तर सुधारमार्फत अर्थपूर्ण र मापनयोग्य परिवर्तन ल्याउनुपर्ने आवश्यकता जोड दिइन्। उनले पहिलो चरण सफल भएको उल्लेख गर्दै दोस्रो चरणमा विभागहरूबीच अझ सुदृढ समन्वय आवश्यक पर्ने बताइन् ताकि नीति कार्यान्वयन प्रभावकारी रूपमा देखिन सकोस्।
उनले सबै विभागलाई आफ्ना-आफ्ना क्षेत्रमा नागरिक तथा अर्थतन्त्रलाई प्रत्यक्ष लाभ पुग्ने परिणाममुखी सुधारतर्फ ध्यान दिन आग्रह गरिन्। उनले पर्यटन, औषधि उद्योग र एमएसएमई जस्ता क्षेत्रहरूमा उच्च सम्भावना रहेको उल्लेख गर्दै व्यापारमा सहजता प्रवर्द्धन गर्न सक्षम वातावरण निर्माण गर्नुपर्ने बताइन्। नागरिक तथा उपभोक्ताले आधारभूत सेवाका लागि कार्यालयदेखि कार्यालय धाउन नपर्ने व्यवस्था सुनिश्चित गर्नुपर्नेमा उनले जोड दिइन्।
मुख्य सचिव तेलाङले व्यापारमा सहजतालाई केवल व्यवसाय सुधारको रूपमा नभई समग्र सुशासन सुधारको प्राथमिकताका रूपमा लिनुपर्ने बताए। उनले विभिन्न विभाग तथा सरोकारवालासँगको अन्तरक्रियाबाट प्रक्रियाको सरलीकरण र अनावश्यक औपचारिकताको कटौती अत्यावश्यक रहेको निष्कर्ष आएको जानकारी गराए। उनले प्रशासनिक प्रक्रियामा सरलता र न्यूनतावाद अवलम्बन गर्नुपर्ने आवश्यकता औंल्याउँदै शासन प्रणाली नागरिक–केन्द्रित हुनुपर्ने धारणा व्यक्त गरे।
हिन्दुस्थान समाचार / बिशाल
